काठमाडौं । अस्मिता खवासको ह्याट्रिकप्रेरित वाग्मती युवा क्लबले राष्ट्रिय महिला लिग २०२४ मा सुदूरपश्चिम प्रदेशविरुद्ध ५–१ को सहज जित निकालेको छ ।

सोमबार सातदोबाटोस्थित एन्फा मुख्यालयमा सम्पन्न खेलमा सर्लाहीको वाग्मतीलाई जित दिलाउन अस्मिताले ह्याट्रिक गरिन् । यस्तै, साहारा लिम्बू र आरती भुजेलले समान एक गोल थपे । सुदूरपश्चिमकी तुल्चा बोहराले एक गोल फर्काइन् ।

खेलको १७औँ मिनेटमा अस्मिताले गोल गर्दै वाग्मतीलाई अग्रतामा राखेकी थिइन् । २६औँ मिनेटमा साहाराको गोलमा वाग्मतीले अग्रतालाई दोब्बर बनायो । ३७औँ मिनेटमा आरतीले गोल गरेपछि वाग्मतीले पहिलो हाफमा ३–० को अग्रता बनाएको थियो ।

८०औँ मिनेटमा अस्मिताले दोस्रो गोल गर्दा वाग्मतीले अग्रतालाई ४–० मा पुर्‍यायो । त्यसको दुई मिनेटपछि अस्मिताले ह्याट्रिक गर्दा वाग्मतीले अग्रतालाई ५–० मा पुर्‍याएको हो । आइतबारदेखि सुरु भएको प्रतियोगिताको यो पहिलो ह्याट्रिक हो ।

९०औँ मिनेटमा सुदूरकी तुल्चा बोहराले सान्त्वना गोल फर्काइन् ।

जितपछि वाग्मतीका सहायक प्रशिक्षक सोनम लामाले टिम लक्ष्यअनुसार प्रदर्शन गर्न सफल बनेको बताए । “हाम्रो योजना तीन अंक लिने थियो । योजनाअनुसार सफल भयौँ । हाम्रो लक्ष्य भनेको शीर्ष पाँचमा रहने हो । विदेशी खेलाडी तीन जना अनुबन्ध गरेका छौँ । विभागीय टिम पनि भएकाले लिग गाह्रो नै छ । हामीलाई सोझै खेल्ने अवसर दिनुभएको एन्फालाई धन्यवाद व्यक्त गर्न चाहन्छु । मधेसबाट दुई टिम आएको छ, चपुर र वाग्मती । दुईवटा टिम हुँदा खेलाडी बाडिएका छन् । यसले केही गाह्रो बनाएको छ,” लामाले भने ।

यस्तै, सुदूरपश्चिम प्रशिक्षक दिपेश योञ्जन लामा भने हारका बावजुद टिमको प्रदर्शनबाट आफू सन्तुष्ट रहेको बताए । “हामी सबै खेलाडी नयाँ हुन् । यति खेलेकोमा पनि म सन्तुष्ट छु । वाग्मती आफ्नै एकेडेमी भएको टिम हो । हामी दुई दिनको तयारीमा आएका छौँ,” उनले भने ।