काठमाडौं । उद्घाटन खेलमा स्याङ्जाको वालिङ नगरपालिकाविरुद्ध ४–० को सहज जित निकाल्दै कोसी प्रदेशले एन्फा महिला लिग–२०२४ मा सुखद सुरुआत गरेको छ ।

आइतबार सातदोबाटोस्थित एन्फा मुख्यालयमा कोसीलाई जित दिलाउन समीक्षा मगरले दुई गोल गरिन् । सञ्जुमाया तामाङले एक गोल थपिन् । कोसीले अर्को एक गोल वालिङबाट आत्मघाती उपहार पाएको थियो ।

खेलको १०औँ मिनेटमा सञ्जुको गोलमा कोसीले अग्रता बनाएको थियो । कोसीले पहिलो हाफभर १–० को अग्रता बनाएको थियो । कोसीले दोस्रो हाफमा तीन गोल थप्यो ।

समीक्षाले ५१औँ मिनेटमा गोल गर्दै कोसीको अग्रता दोब्बर बनाइन् । त्यसको आठ मिनेटपछि समीक्षाकै गोलमा कोसीले अग्रतालाई ३–० मा पुर्‍यायो । ५९औँ मिनेटमा वालिङकी यमकुमारी विकबाट आत्मघाती गोल उपहार पाएपछि कोसीले ४–० को जित पक्का गरेको हो ।

जितपछि कोसीका प्रशिक्षक श्याम मानन्धरले रणनीतिअनुसार खेल्न नसके पनि नतिजाप्रति सन्तुष्टि व्यक्त गरे । “पहिलो खेल टर्फमा भएर पहिलो हाफ राम्रो खेल्न सकेनौँ । पानीले पनि अप्ठ्यारो बनायो । दोस्रो हाफमा गोल निस्किएर पनि खेल्न सजिलो भयो,” प्रशिक्षक मानन्धरले भने ।

प्रतियोगिताका निम्ति कोसीले तीन विदेशी खेलाडी ल्याए पनि कानुनी प्रक्रिया पूरा नहुँदा मैदानमा उतार्न पाएन । कोसीले प्रतियोगिताका निम्ति सुमिता सरकार, तमलिका सरकार र भुली सरकारलाई अनुबन्ध गरेको छ । कोसी सुर्खेतमा भएको राष्ट्रिय महिला लिगको विजेता समेत हो ।

वालिङका प्रशिक्षक दिलीप थापाले भने टिमले योजनाअनुसार प्रदर्शन गर्न नसकेको बताए । “आज भनेजस्तो खेल खेल्न सकेनौँ । हाम्रो विपक्षी टिमले उत्कृष्ट खेल पस्किनुभयो,” प्रशिक्षक थापाले भने, “आजको तीन अंक महत्त्वपूर्ण थियो । लिगका सबै टिम जित्नकै लागि खेल्ने हो । हामीले विदेशी खेलाडी प्रयोग गर्न पाएनौँ । त्यसले पनि हाम्रो रणनीतिअनुसारको प्रदर्शन हुन सकेन ।”

आइतबारदेखि सुरु प्रतियोगितामा कुल १० टिमले प्रतिस्पर्धा गर्नेछन् । लिगमा तीन विभागीय – नेपाल पुलिस, एपीएफ र आर्मीसँगै कोसी, वाग्मती नगरपालिका, चन्द्रपुर नगरपालिका, संकटा क्लब, वालिङ नगरपालिका, सुदूरपश्चिम प्रदेश र कर्णाली प्रदेशको सहभागिता छ ।

प्रतियोगिताको पहिलो चरणपछि शीर्ष पाँच स्थानमा रहने टिम दोस्रो चरणमा प्रवेश गर्नेछन् । ‘डबल राउन्ड रोबिन’ पद्धतिमा उक्त पाँच टिमबीच प्रतिस्पर्धा हुनेछ । दोस्रो राउन्डबाट शीर्ष चार टिमले प्लेअफमा स्थान बनाउनेछन् ।