काठमाडौं । नेपाली कांग्रेसका महामन्त्रीद्वय गगन थापा र विश्वप्रकाश शर्माको प्रतिवेदनमा अझै सहमति जुटेको छैन ।

गत फागुन ७–१० सम्म गोदावरीमा भएको महासमिति बैठकबाट पारित प्रतिवेदनका विषयमा सहमति नजुट्दा केन्द्रीय समितिले अनुमोदन गर्ने वा नगर्ने टुंगो लागेको छैन । सभापति शेरबहादुर देउवाले सोही विषयमा आइतबार सानेपामा पदाधिकरी र पूर्वपदाधिकारीको बैठक आह्वान गरेका छन् ।

आजै दिउँसो २ बजे बस्ने गरी केन्द्रीय समितिको बैठक डाकिएको छ । पदाधिकारी र पूर्वपदाधिकारीबीचको छलफलपछि मात्र उक्त बैठक सुरु हुनेछ ।

०८२ भित्र पार्टीको महाधिवेशन गर्ने र चुनावी गठनबन्धन नगर्ने महामन्त्री थापाको प्रस्ताव संस्थापन पक्षले स्वीकार गरेको छैन । त्यसलाई विवादित विषयका रूपमा राखिएको छ ।

अर्का महामन्त्री शर्माको प्रस्ताव ‘एक्जिट पोलेसी’अन्तर्गत १, २, ३, ४ मा संस्थापन पक्षले ग्रम्भीर प्रश्न उठाएको छ । एकै नेताले दशकौँ ओगट्ने प्रवृत्ति अन्त्यका निम्ति शर्माले कांग्रेसबाट राष्ट्रपति एकपटक, प्रधानमन्त्री दुईपल्ट, मन्त्री तीनचोटि र सांसद चारपालिभन्दा बढी बन्न नपाइले प्रस्ताव गरेका छन् ।

उनको त्यो प्रस्ताव अव्यावहारिक मात्र नभएर आपत्तिजनक भएको संस्थापन पक्षको भनाइ छ । संस्थापनइतर पक्षका नेताहरूले समेत शर्माको प्रतिवेदनको ‘एक्जिट पोलेसी’ संसदीय व्यवस्थानको मर्मविपरीत भनेर टिप्पणी गरेका छन् ।

यी विषयमा सभापतिले दुई उपसभापति र महामन्त्री तथा पदाधिकारी र पूर्वपदाधिकारीसँग सहमतिको प्रयास गरिरहेका छन् । तर, महामन्त्री आफ्नो प्रस्तावमा अडिग र संस्थापनले यसलाई अस्वीकार गर्ने भनेका कारण सहमति भएको छैन ।

मध्यमार्ग खोजी
०८२ भित्र महाधिवेशन गर्ने विषय केन्द्रीय समितिको अधिकार भएको संस्थापन पक्षको जिकिर छ । त्यसलाई केन्द्रीय समितिमार्फत निर्णय गरी समयमै महाधिवेशन सम्पन्न गर्ने भन्ने शब्दावलीसहित सच्याएएर अघि बढ्ने विषयमा छलफल थालिएको छ ।

तर, चुनावी गठबन्धन नगर्ने विषय रणनीतिक भएकाले दस्तावेजमा राख्न नहुने संस्थापन पक्षको अडान छ । त्यसलाई ‘सार्वजनिक रूपमा मुख देखाउन मिल्ने गरी सच्याउन’ महामन्त्री थापाले भनेको उनीनिकट एक केन्द्रीय सदस्यले जानकारी दिए ।

शर्माको ‘एक्जिट पोलेसी’ भने संविधान संशोधनका बेला सम्बोधन हुने गरी प्रस्ताव लैजाने भनेर टुंग्याउने प्रयास गरिएको संस्थापन पक्षका एक केन्द्रीय सदस्यले जानकारी दिए ।