काठमाडौं । क्यारेबियन राष्ट्रहरूको समूह वेस्ट इन्डिज, ब्रिटिस भर्जिन आइल्यान्ड र केम्यान आइल्यान्ड्सबाट नेपालमा साढे १५ अर्ब रुपैयाँ लगानी आएको छ ।

नेपाल राष्ट्र बैंकले शुक्रबार सार्वजनिक गरेको ‘प्रत्यक्ष वैदेशिक लगानीसम्बन्धी सर्वेक्षण प्रतिवेदन, २०७९/०८०’ मा ती राष्ट्रहरूबाट नेपालमा १५ अर्ब ४३ करोड ३१ लाख रुपैयाँ लगानी भित्रिएको देखाइएको छ ।

प्रतिवेदनमा आर्थिक वर्ष २०७९/०८० को अन्त्यसम्ममा नेपालमा कुल ५८ देशले दुई खर्ब ९५ अर्ब ५० करोड रुपैयाँ प्रत्यक्ष वैदेशिक लगानी गरेको उल्लेख छ । उक्त प्रत्यक्ष वैदेशिक लागनीमध्ये झन्डै साढे १५ अर्ब रुपैयाँ क्यारेबियन राष्ट्रहरूको समूह वेस्ट इन्डिज, ब्रिटिस भर्जिन आइल्यान्ड र केम्यान आइल्यान्ड्सबाट नेपाल भित्रिएको हो ।

कुल वैदेशिक लगानीमध्ये चुक्ता पुँजीको अंश ५२.८ प्रतिशत, सञ्चिति ३३.७ प्रतिशत र कर्जाको अंश १३.५ प्रतिशत रहेको छ ।

आर्थिक वर्ष १९९५/९६ देखि २०२२/२३ सम्मको २८ वर्षको अवधिमा उक्त प्रत्यक्ष वैदेशिक लगानी नेपालमा भएको हो ।
बितेको २८ वर्षमा नेपालमा भएको वैदेशिक लगानीमा छैटौँ ठूलो लगानी वेस्ट इन्डिजबाट आएको छ । कुल प्रत्येक्ष वैदेशिक लगानीको ४.८७ प्रतिशत वेस्ट इन्डिजबाट नेपालमा आएको छ ।

प्रतिवेदनमा अनुसार वेस्ट इन्डिजबाट उक्त अवधिमा नेपालमा १४ अर्ब ३९ करोड ५७ लाख रुपैयाँ लागनी आएको छ । जसमा चुक्ता पुँजी आठ करोड रुपैयाँ, सञ्चिति १४ अर्ब ३१ करोड ४६ लाख रुपैयाँ र कर्जा ११ लाख रुपैयाँ छ ।

क्यारेबियन टापु ब्रिटिस भर्जिन आइल्यान्डबाट नेपालमा हालसम्म ६७ करोड दुई लाख रुपैयाँ प्रत्यक्ष वैदेशिक लगानी आएको छ । सोही समयमा केम्यान आइल्यान्ड्सबाट ३६ करोड ७२ लाख रुपैयाँ लगानी नेपालमा आएको प्रतिवेदनमा उल्लेख छ ।