काठमाडौं । नेपालकी पारा तेक्वान्दो खेलाडी पलेशा गोवर्धन पेरिस पारालम्किप–२०२४ को क्वार्टरफाइनलमा पराजित भएकी छन् ।

पलेशाले शुक्रबार भएको क्वार्टरफाइनलमा ब्राजिलकी सिल्भाना फर्नान्डेससँग हार बेहोरेकी हुन् । पलेशालाई फर्नान्डेसले महिला के–४४–५७ केजी तौल समूहमा १०–८ ले पराजित गरिन् । खेलको अन्तिम २० सेकेन्ड बाँकी रहँदा पनि पलेशा दुई अंकले अघि थिइन् ।

तर, यसपछि फर्नान्डेसले लगातार चार अंक जोड्दै पलेशालाई पछि पारेकी हुन् ।

यसअघि पलेशाले आफ्नो पहिलो खेलमा भेनेजुयाली प्रतिद्वन्द्वीलाई सहजै हराइन् । उनले भेनेजुयलाकी मोरालेस भालेरियालाई ३१–० ले पराजित गरेकी थिइन् ।

पेरिस पारालम्पिकमा यसअघि नेपालका भरतसिंह महताले प्रतिस्पर्धा गरेका थिए । भरत प्रतियोगिताको पहिलो चरणमै पराजित भएका थिए ।

पलेशा गत वर्ष चीनको हाङझाउमा सम्पन्न पारा एसियाली खेलकुदकी कांश्य विजेतासमेत हुन् ।