काठमाडौं । नेकपा (एमाले)का सांसद पदम गिरीले सुन तस्करीको सही ढंगबाट छानबिन नगरेर तत्कालीन पुष्पकमल दाहाल ‘प्रचण्ड’ नेतृत्वको सरकारले नेकपा (माओवादी केन्द्र)का शीर्ष नेतालाई जोगाउने काम गरेको आरोप लगाएका छन् । बिहीबार प्रतिनिधिसभा बैठकमा उनले यस्तो आरोप लगाएका हुन् ।

सही ढंगबाट छानबिन गरिएको भए माओवादीका शीर्ष तहका कोही नेता बाँकी नरहने उनले जिकिर गरे । उनले सुशासनका ठूलाठूला कुरा गर्ने तर बालुवाटारको जग्गा प्रकरणमा पूर्वप्रधानमन्त्रीलाई कारबाही गर्न नसकी उन्मुक्ति दिइएको बताए ।

गणतन्त्रपछिका आठ वर्ष ऊर्जा मन्त्रालयको नेतृत्व माओवादीले लिएको र त्यस अवधिमा किन विद्युत्को बक्यौता नउठाइएको भन्दै प्रश्न गरे । ट्रंकलाइन र डेडिकेटेड लाइनको बक्यौता उठाउन नसक्नेले वर्तमान सरकारलाई हिलो नछ्याप्न उनले चेतावनी समेत दिए ।

प्रतिनिधिसभा बैठकमा सांसद पदम गिरीको भनाइ पढ्नोस्–
नेकपा (माओवादी केन्द्र)तिर फर्किएर कुनै प्रश्न गर्न म आएको होइन । हिजोको सरकारतिर फर्किएर प्रश्न गर्न मन थिएन । तर, पूर्वप्रधानमन्त्री पुष्पकमल दाहालले जुन प्रश्नहरू संसद्मा तेर्स्याउनुभयो, त्यसलाई हामीले टुलुटुलु हेरेर बस्न सक्दैनौँ । म सुशासनको पक्षमा छु । म ट्रंकलाइन र डेडिकेटेड लाइनमा राज्यले लिनुपर्ने २२ अर्ब बक्यौता उठाउने पक्षमा थिएँ । अहिलेको सरकारले त्यो उठाउन दिएन भन्ने प्रकारले हिलो छ्याप्ने कोसिस गर्नुभयो । म उहाँलाई प्रश्न सोध्न चाहन्छु– तपाईंहरूले ऊर्जा मन्त्रालय सम्हालेको पछिल्लो आठ वर्ष भयो । निरन्तर आठ वर्ष ऊर्जा मन्त्रालयको नेतृत्व गरिरहँदा किन आजसम्म बक्यौता उठाउन चाहनु भएन ? किन बक्यौता उठाउनेतिर लाग्नु भएन ? उद्योगी, व्यापारीहरूले तिर्नुपर्ने बिल कति हो टीओडी मिटरअनुसार भन्ने कुरा आज पनि दिन सकेको छैन, किन प्राधिकरणले दिन चाहँदैन ? सुशासनको कुरा गर्नुभयो, ललितानिवासको जग्गालाई व्यक्तिका नाममा सुम्पने हर्कत गर्ने मानिसलाई कारबाहीको दायरामा ल्यायौँ भन्नुभयो । अनुसन्धानको दायरामा ल्याई कारबाही अघि बढाउन भनेको थियो सर्वोच्च अदालतले, तर पूर्वप्रधानमन्त्रीमाथि छानबिन गर्न तत्कालीन प्रधानमन्त्री पुष्पकमल दाहालले गठबन्धनको बैठक बोलाएर हामी अनुसन्धान गर्न सक्दैनौँ भनेको होइन ? जनताको आक्रोश थेग्न नसकेपछि घरघरमा सीआईबी पठाएर अनुसन्धान गर्न खोजेको जस्तो गरी उन्मुक्ति दिने काम गरेको हो कि होइन ? त्यही हो सुशासनको पक्षमा उभिएको ? कमरेड प्रचण्ड नेतृत्वको सरकारको पालामा इतिहास रच्ने काम भयो । सायद यसको सही ढंगले छानबिन भएको भए, पारदर्शी ढंगले छानबिन भएको भए सायद तपाईंको पार्टीको हेडक्वार्टरमा कोही मानिस बाँकी रहँदैन थिए, यो म भन्न सक्छु । न्युज एजेन्सी नेपाल