काठमाडौं । नेकपा (एमाले)का सांसद गोकुल बाँस्कोटाले डेटिकेड तथा ट्रंकलाइनको बक्यौता रकम किन उठाइए भनेर छानबिनका निम्ति शक्तिशाली समिति गठनको माग गरेका छन् । बिहीबार प्रतिनिधिसभा बैठकमा नेकपा (माओवादी अध्यक्ष केन्द्र)का अध्यक्ष पुष्पकमल दाहाल ‘प्रचण्ड’लाई जवाफ दिँदै उनले यस्तो माग गरेका हुन् ।

गएको मंगलबारको संसद् बैठकमा प्रचण्डले प्रतिनिधिसभाअन्तर्गतको सार्वजनिक लेखा समितिको काम–कारबाहीमाथि प्रश्न उठाउँदै धम्की दिएको उनले उल्लेख गरे । उनले छानबिनपछि माफियालाई कसले संरक्षण कसले भन्ने स्पष्ट हुने बताए ।

“लेखा समितिले पुग्दैन भने संसद्‌बाट एउटा शक्तिशाली छानबिन समिति गठन गरियोस् । किन २२ अर्ब उठेन, कसका कारणले उठेन, कसले पत्र लेखेर रोक्यो ?,” उनले प्रश्न गरे ।

नेपाल विद्युत् प्राधिकरणमा सात वर्षदेखि एकै व्यक्तिले नेतृत्व गरेको भन्दै उनले अरू कम्पनीको आर्थिक अवस्था के छ भनेर हेरिनुपर्नेमा जोड दिए । उनले प्रचण्डले नै बक्यौता रकम नउठाउन भनेको आरोप समेत लगाए ।  प्रचण्डले ‘नतिरे हुन्छ’ भन्ने पत्र लेखेको भन्दै बाँस्कोटाले त्यसको जवाफ पनि उनलै दिनुपर्ने बताए ।

लेखा समितिको चुनाव गराऔंँ भनेकामा आफूमाथि संगठनात्मक रूपमा आक्षेप लगाइएको उनले उल्लेख गरे ।