काठमाडौं । गौरा पर्वको अवसरमा काठमाडौंको टुँडीखेलमा उपस्थित प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवाविरुद्ध नाराबाजी गरेको भन्दै काठमाडौं प्रहरीले तीन जनालाई पक्राउ गरेको छ ।
उनीहरुलाई सार्वजनिक शान्तिविरुद्धको मुद्दामा अनुसन्धान थालिएको छ । काठमाडौं प्रहरी परिसरका एसपी नवराज अधिकारीका अनुसार पक्राउ परेका तीन जनाले सार्वजनिक स्थलमा गर्न नहुने कार्य गरेको पाइएको छ । 
अधिकारीका अनुसार उनीहरुलाई सार्वजनिक शान्तिविरुद्धको कसुरमा अनुसन्धान अघि बढाइएको छ ।

जब देउवा र ओलीले रिस थाम्नै नसक्ने गरी टुँडिखेलमा बालेनको पक्षमा हुटिङ भयो

प्रधानमन्त्री ओली गौरा पर्वको कार्यक्रममा उपस्थित हुनासाथ उनीविरुद्ध काठमाडौंको टुँडिखेलमा नाराबाजी भएको थियो ।  सुदूरपश्चिमको मुख्य चाड गौरा पर्वमा गएका प्रधानमन्त्री ओलीविरुद्ध दर्शकदीर्घाको अन्तिम लहरबाट नाराबाजी भएको थियो

उनीहरूले ‘केपी .... पाराले, दुःख पाएर साराले’सहितका नारा लगाएका थिए ।  मञ्चको केही टाढाबाट नाराबाजी गरेको भिडियो सामाजिक सञ्जालमा सार्वजनिक भएको छ । उनीहरुलाई केही राजनीतिक दल र नेताले उचालेको आशंका प्रहरीलाई छ ।

यस्तो नाराबाजी गरेको आरोपमा पक्राउ परेका सुर्खेतका गोपीकृष्ण जैसी, कञ्चनपुरका दीपक ठगुन्ना र अछामका रामबहादुर बुढालाई पक्राउ गरिएको हो । नाराबाजी गरेलगत्तै दुई जनालाई पक्राउ गरिएको थियो भने थप एक जनालाई बुधबार पक्राउ गरिएको प्रहरीले जनाएको छ ।

गौरा पर्वको कार्यक्रममा नाराबाजी गर्ने युवाहरूलाई तत्काल रिहा गर्न हरि ढकालको माग

उनीहरूले काठमाडौं महानगरपालिकाका मेयर बालेन शाहको पक्षमा भने हुटिङ गरेका थिए । नाराबाजीको अन्त्यतिर उनीहरूले ‘बालेन, बालेन’ भनेर हुटिङ गरेका थिए । लगातार हुटिङ भएपछि सम्बोधनका लागि पुगेका कांग्रेस सभापति देउवा उनीहरुप्रति आक्रोशित भएका थिए । 

कांग्रेस सभापति देउवा निकै आक्रामकरूपमा प्रस्तुत भए । प्रायः छोटो भाषण गर्ने देउवा नाराबाजी गर्नेविरुद्ध खनिए ।  भाषणको सुरुमा देउवा नम्र देखिएका थिए । उनको अनुहारमा रिस उठेको त देखिन्थ्यो तर उनले नियन्त्रणमै राखेका थिए ।

टुँडिखेलमा प्रधानमन्त्री ओलीविरुद्ध नाराबाजी, बालेनको पक्षमा हुटिङ

तर, नाराबाजी झन् चर्को बनेपछि देउवाले रिस थाम्न सकेनन् । सुरुमा त उनले ‘जति कराउनु छ, तपाईंहरू कराउनुस्’ भने । 

दर्शकदीर्घाबाट आवाज झन् चर्को बन्यो । देउवा पनि के कम, औँला ठड्याएरै भने, ‘लाज पनि छैन, अर्काको कार्यक्रम बिथोल्ने ? लाज नभएकाहरू, बदमासहरू ।’ ‘यही हो नेपालको संस्कृति, यही हो नेपालको चलन ? यही सिकेर आएको ? बदमासहरू’ आफ्नै शैलीमा देउवाले उनीहरुलाई हप्काउँदै भनेका थिए ।