काठमाडौं । कृषि तथा पशुपन्छी विकासमन्त्री रामनाथ अधिकारीले नेपालमा उत्पादित अर्थोडक्स चिया बजारीकरणलाई आवश्यक सहजीकरण गर्ने बताएका छन् । 

नेपालमा उत्पादित अर्थोडक्स चिया प्रतिस्पर्धा एवं ५८ कारखानाका एक सयभन्दा बढी प्रकारकोे चिया प्रदर्शनी कार्यक्रमको मंगलबार काठमाडौंमा उद्घाटन गर्दै अधिकारीले अर्थोडक्स चियाले विश्वका उत्कृष्ट चियासँग प्रतिस्पर्धा गर्नसक्ने बताए । यसको बजारीकरणलाई सरकारले सहजीकरण गर्ने उनको भनाइ छ । 

मन्त्री अधिकारीले नेपाली चियाको बजारीकरणका लागि भारतीय बजारको विकल्प खोज्नुपर्नेमा जोड दिए । नेपालको अर्थोडक्स चिया परम्परा र संस्कृतिमा गहिरो सम्बन्ध भएको सम्पदासमेत भएको उनको भनाइ छ । 

उनले नेपाली चियाको आन्तरिक खपत वृद्धि गर्न गुणस्तर सुधारमा केन्द्रित हुनुपर्ने बताए ।