काठमाडौं । सन् २००४ को यू–१९ विश्वकपमा भारतीय युवा ब्याटर शिखर धवनले खुबै चर्चा बटुले । प्रतियोगितामा भारतीय टिम सेमिफाइनलबाट अघि बढ्न सकेन । तर, धवनले यही प्रतियोगिताबाट भारतीय सिनियर राष्ट्रिय टिमसम्म पुग्ने आधार खडा गरे ।

त्यति बेला उनी प्रतियोगिताकै सबैभन्दा धेरै रन बनाउने खेलाडी बनेका थिए । धवनले कुल ५०५ रन जोडेका थिए । सात इनिङ्समा उनले तीन शतक र एक अर्धशतक बनाए । प्रतियोगितामा उनको औसत ८४.१६ र स्ट्राइक रेट ९३.५१ थियो ।

सन् २०२२ अघिसम्म धवन नै यू–१९ विश्वकपको इतिहासमा सबैभन्दा धेरै रन बनाउने ब्याटर थिए । २०२२ को संस्करणमा दक्षिण अफ्रिकाका डेवाल्ड ब्रेविसले धवनको उक्त कीर्तिमानलाई एक रनले पछि पारे ।

सानदार टेस्ट डेब्यु
धवनले सन् २०१० मा भारतीय टिमबाट एकदिवसीय क्रिकेटमा डेब्यु गरेका थिए । तर, त्यसको तीन वर्षसम्म उनले यो संरचनामा खास रन जोड्न सकेनन् । २०१३ मार्चमा टेस्ट क्रिकेटमा डेब्यु गर्दा धवन पुनः सञ्चारमाध्यमको हेडलाइन बने ।

एकदिवसीय क्रिकेटमा डेब्यु गर्दा आफू नर्भस बनेको धवन आफैँ स्वीकार गर्छन् । अस्ट्रेलियाविरुद्धको उक्त खेलमा धवन दुई बल खेल्दा रन नजोडी आउट भएका थिए । तर, तीन वर्षपछि अस्ट्रेलियाविरुद्ध नै टेस्टमा डेब्यु गर्दा धवनमा नर्भसनेस हाबी बन्न पाएन ।

मोहालीमा भएको उक्त टेस्टमा धवनले १८७ रनको सानदार इनिङ खेले । उनले अस्ट्रेलियाविरुद्ध ८५ बलमै शतक बनाएका थिए । यो स्कोर अझै पनि टेस्ट क्रिकेटमा डेब्युट्यान्टको सबैभन्दा छिटो शतक हो । धवनपछि आजसम्म कुनै भारतीय ब्याटरले टेस्ट क्रिकेटको डेब्युमै १८७ रन बनाउन सकेका छैनन् ।

“म हतारमा खेलिरहेको थिइनँ । ब्याटको प्रहारपछि चौका आफैँ आइरहेको थियो,” उक्त कीर्तिमानपछि धवनले दिएको प्रतिक्रिया यस्तो थियो ।

भारतले च्याम्पियन्स ट्रफी जित्दाका नायक
सन् २०१३ मा इंग्ल्यान्डमा आयोजित च्याम्पियन्स ट्रफीअघिसम्म धवन भारतीय टिमबाट अढाई वर्षमा पाँचपटक एकदिवसीय खेलमा मैदानमा उत्रिएका थिए । त्यसक्रममा उनले ६९ रन मात्र बनाएका थिए । उक्त वर्षको च्याम्पियन्स ट्रफीपछि भने उनको यो खराब लय तोडियो ।

उनले प्रतियोगिताका सुरुआती दुई खेलमा दक्षिण अफ्रिका र वेस्ट इन्डिजविरुद्ध लगातार शतक प्रहार गरे । यसपछि उनले पाकिस्तानविरुद्ध ४८, श्रीलंकाविरुद्ध ६९ र इंग्ल्यान्डविरुद्ध ३१ रन बनाए । प्रतियोगिताको उपाधि भारतले जित्दा धवन नै प्लेयर अफ दी सिरिज घोषित भए । उनले प्रतियोगिताभर ९०.७५ को औसतमा ३६५ रन बनाए ।

“मेरो सपना यही थियो । म निकै खुसी छु,” प्रतियोगितापछि धवनले भनेका थिए ।

उत्कृष्ट आईपीएल करियर
विश्वकै सबैभन्दा ठूलो क्रिकेट फ्रेन्चाइज लिग इन्डियन प्रिमियर लिग (आईपीएल)मा धवनले पाँच टिमको प्रतिनिधित्व गरे । उनले दिल्ली क्यापिटल्स (दिल्ली डेयरडेभिल्स), मुम्बई इन्डियन्स, डेकान चार्जर्स, सनराइजर्स हैदराबाद र पञ्जाबबाट आईपीएल खेले ।

आईपीएलका २२२ खेलमा उनले ६ हजार ७६९ रन बनाए । यसक्रममा उनको औसत ३५.२५ र स्ट्राइक रेट १२७.१४ रह्यो ।

उनले आईपीएलमा पहिलो शतक बनाउन १६७ खेल कुर्नुपर्‍यो । सन् २०२० को संस्करणमा धवनले चेन्नाई सुपर किंग्सविरुद्ध पहिलो शतक बनाएका थिए । यसपछि लगत्तै अर्को खेलमा पञ्जाब किंग्सविरुद्ध उनले शतक बनाए । त्योसँगै उनी आईपीएलको इतिहासमा लगातार दुई खेलमा शतक बनाउने पहिलो ब्याटर बने ।

पछिल्लो एक दशक भारतीय टिम र आईपीएलमा फरक पहिचान बनाएका उनै धवनले शनिबार अन्तर्राष्ट्रिय र घरेलु क्रिकेटबाट सन्न्यासको घोषणा गरे । उनले भारतीय टिमबाट ५८ टेस्ट, १६४ एकदिवसीय र ६६ ट्वान्टी–२० अन्तर्राष्ट्रिय खेलमा प्रतिनिधित्व गरे । त्यसक्रममा उनले टेस्ट क्रिकेटमा दुई हजार ३१५, एकदिवसीयमा ६ हजार ७९३ र ट्वान्टी–२० मा एक हजार ७५९ रन बनाए ।