काठमाडौं । फरवार्ड एर्लिङ हाल्यान्डको ह्याट्रिकप्रेरित म्यानचेस्टर सिटीले इंग्लिस प्रिमियर लिगमा इप्सविचविरुद्ध ४–१ को सहज जित निकालेको छ ।

घरेलु मैदान इत्तिहाद रंगशालामा सम्पन्न खेलमा सिटीबाट हाल्यान्डले ह्याट्रिक गर्दा अर्को एक गोल केभिन डी ब्रुयनाले थपे ।

खेलमा सुरुआती अग्रता भने इप्सविचले बनाएको थियो । सातौँ मिनेटमा सामी स्मोडिक्सले गोल गर्दै पाहुना टिमलाई अग्रतामा राखेका थिए । तर, इप्सबीचको यो अग्रता लामो समय भने टिक्न सकेन ।

१२औँ मिनेटमा हाल्यान्डले पेनाल्टीमार्फत गोल गर्दै सिटीलाई खेलमा फर्काएका थिए । त्यसको दुई मिनेटपछि नै केभिडन डी ब्रुयनाले गोल गरेपछि सिटीले अग्रता २–१ मा पुजितयायो । १६औँ मिनेटमा हाल्यान्डले दोस्रो गोल गरेपछि सिटीले पहिलो हाफमै ३–१ को अग्रता बनाएको थियो । यस्तै, खेलको निर्धारित समय सकिन दुई मिनेट बाँकी रहँदा हाल्यान्डले ह्याट्रिक गरेपछि सिटीले ४–१ को सहज जित निकालेको हो ।

यो जितसँगै सिटीले घरेलु मैदानमा अपराजित यात्रालाई ४४ खेलसम्म लम्ब्याएको छ ।

नयाँ सिजनको सुरुआती दुई खेलमा जित निकालेको सिटी ६ि अंकसहित तालिकाको शीर्ष स्थानमा छ । सिटीले यसअघि पहिलो खेलमा चेल्सीविरुद्ध उसैको मैदानमा २–० को जित निकालेको थियो ।

प्रिमियर लिगअन्तर्गत शनिबार नै भएका अन्य खेलमा ब्राइटनले म्यानचेस्टर युनाइटेडविरुद्ध २–१ को जित निकालेको छ । यस्तै, क्रिस्टल प्यालेसले वेस्ट ह्यामविरुद्ध २–० को र फुलहमले लेस्टर सिटीविरुद्ध २–१ को जित निकालेको छन् ।