काठमाडौं । साउदी प्रो लिग २०२४–२५ को पहिलो खेलमा क्रिस्टियानो रोनाल्डोको टिम अल नासर बराबरीमा रोकिएको छ । बिहीबार अल अवाल रंगशालामा अल नासर र अल राइद १–१ को बराबरीमा रोकिए ।

अल नासरले पहिलो हाफको अग्रता जोगाउन नसक्दा दुई अंक गुमाएको हो । अल नासरबाट रोनाल्डोले ३४औँ मिनेटमा गोल गर्दै टिमलाई अग्रतामा राखेका थिए । तर, ४९औँ मिनेटमा पेनाल्टीमार्फत मोहमेद फौजैरले गोल गरेपछि अल–राइद खेलमा फर्कियो ।

अल नासर एक अंकसहित तालिकाको चौथो स्थानमा छ । समान अंकको अल राइद पाँचौँ स्थानमा छ ।

गत सिजन अल नासरले दोस्रो स्थानमा रहँदै लिग टुंग्याएको थियो । अल राइदले १२औँ स्थान हासिल गरेको थियो ।

बिहीबारदेखि सुरु प्रो लिगमा कुल १८ टिमले प्रतिस्पर्धा गर्नेछन् ।