काठमाडौं । नेपाली कांग्रेसका नेता अर्जुननरसिंह केसीले पाँच वर्षे हदम्याद भ्रष्टाचारीलाई जोगाउने बाहाना भएको बताएका छन् ।  यो मापदण्ड राखे विद्रोह हुने उनको भनाइ छ । 

पाँच वर्षअघिका भ्रष्टाचार मुद्दा चलिरहेको भन्दै राज्यव्यवस्था समितिको आज बसेको बैठकमा उनले भने, “भ्रष्टाचारको हदम्याद पाँच वर्षको कुरा किन आयो ? संशोनकर्ताले नोटअफ डिसेन्ट राख्न मिल्छ कि मिल्दैन ? म यसको विरोध गर्छु ।  हदम्याद राख्नु हुँदैन ।” संशोधनकर्ता केसीले नीतिगत निर्णय परिभाषित हुनुपर्ने उनको भनाइ छ ।  

अर्का संशोधनकर्ता रोशन कार्कीले भ्रष्टाचार छानबिन गर्न हदम्याद हुन नहुने बताइन् । “हदम्याद राख्यौँ भने भ्रष्टाचार गर्ने ऐन बनाउन लागेको जस्तो हुन्छ,” उनले भनिन्, “दुई करोडभन्दा माथिको भ्रष्टाचार गर्नेलाई जन्मकैदको व्यवस्था राख्नुपर्छ ।”