काठमाडौं । सरकारले नेपाल पनि मंकिपक्स (एम्पक्स) संक्रमणको जोखिममा रहेकाले सतर्कता अपनाउन आग्रह गरेको छ । आइतबार एक विज्ञप्तिमार्फत स्वास्थ्य तथा जनसंख्या मन्त्रालयले एम्पक्स संक्रमणविरुद्ध पूर्वतयारी थालिसकेको जानकारी दिएको छ ।

मन्त्रालयका अनुसार, हवाई तथा जमिनका नाकाहरूमा रहेका हेल्थ डेस्क स्थापना गरिएको छ ।। "सरुवा रोगको निगरानी सर्विलेन्स गर्ने तीनै तहका निकायहरूलाई सतर्क गराइसकेको र सबै प्रदेशमा यस रोगको निदान तथा व्यवस्थापनका लागि अस्पताल र चिकित्सक तोकिसकेको जानकारी गराउन चाहन्छौँ," मन्त्रालयले भनेको छ ।

मन्त्रालयबाट पूर्वतयारी प्रतिकार्य र व्यवस्थापन भए पनि आमनागरिकबाट जनस्वास्थ्यका मापदण्ड पालना भए मात्र मंकिपक्सको रोकथाम र नियन्त्रणका लागि सम्भव हुने भएकाले सबैलाई जनस्वास्थ्यका मापदण्ड पालना गर्न आग्रह गरिएको छ ।

मन्त्रालयका अनुसार केही समययता कोंगोमा मंकिपक्स भाइरसको अधिक घातक संस्करण 'क्लेड १बी'का बिरामीहरू उल्लेखनीय रूपमा बढिरहेका छन् । गत जनवरीदेखि हालसम्म यसका कारण कोंगोमा ५४८ जनाको मृत्यु भइसकेको छ ।

कोंगोका छिमेकी देशहरूमा पनि द्रुतरूपमा फैलिरहेकाले विश्व स्वास्थ्य संगठनले अफ्रिकामा भइरहेको एम्पक्सको वृद्धिलाई १४ अगस्ट २०२४ मा 'विश्वव्यापी जनस्वास्थ्य आपत्‌काल'को रूपमा घोषणा गरेको छ ।

एम्पक्स संक्रमणमा ज्वरो आउने, ज्वरो सुरु भएको एकदेखि तीन दिनभित्र छाला, अनुहार, हत्केला, र पैतालामा डाबर देखा पर्ने, डाबर परिवर्तन भई फोका हुँदै पाप्रा लागेर उप्किने, टाउको, ढाड र मांसपेशी दुख्ने र शरीरका ग्रन्थीहरू बढ्ने हुन्छ । आँखामा संक्रमण भई दृष्टि गुम्ने, निमोनिया, मस्तिष्क ज्वर, गर्भ खेर जाने र मृत्युसमेत हुन सक्छ ।

नेपालमा असार १ गते पहिलोपटक ६० वर्षीया नेदरल्यान्डकी नागरिकमा मंकिपक्स (एम्पक्स) संक्रमण पुष्टि भएको थियो ।