काठमाडौं । समन्वय नै नगरेर नेपाल विद्युत् प्राधिकरणले अप्टिकल फाइबर काटिदिएपछि सोमबार आफ्नो नेटवर्कमा समस्या आएको एनसेनले बताएको छ ।

प्राधिकरणले समन्वय नै नगरी बिजुलीको पोल सार्ने क्रममा अप्टिकल फाइबर काटिदिएपछि एनसेलको सेवा ठप्प बनेको स्रोत बताउँछ ।

एनसेलले सेवा रोकिएको करिब एक घण्टाभित्रै सेवा पुनः सञ्चालनमा ल्याएको बताएको छ । 

स्रोतका अनुसार प्राधिकरणले पोल सार्ने क्रममा पोखरा र दमौली जोड्ने एनसेलको मुख्य अप्टिकल फाइबर चुडिँदा समस्या आएको हो । 

मुख्य अप्टिकल फाइबरमात्रै नभएर विकल्पको रूपमा काम गर्ने अप्टिकल फाइबर पनि सडकमा कल्भर्ट बनाउने क्रममा चुडिएको थियो । यसरी दुवै अप्टिकल फाइबर लाइन चुडिँदा नेटवर्कमा समस्या आएको एनसेलले जनाएको छ ।

नेटवर्कमा समस्या आएपछि एनसेलका ग्राहकले कल गर्न, डेटा सेवा चलाउन र एसएमएस पनि पठाउन सकेका थिएनन् । 

यसअघि पनि एनसेल र नेपाल टेलिकमका अप्टिकल फाइबरहरू पटकपटक काटिएर वा चुडिएर सेवा अवरुद्ध भएका थिए ।

इन्टरनेट, फोन कल र म्यासेजजस्ता महत्त्वपूर्ण दूरसञ्चार सेवा अवरुद्ध हुने अवस्थालाई ध्यान नदिएर लापरबाहीपूर्ण तरिकाले काम गर्नु अनुचित भएको सरोकारवालाहरू बताउँछन् ।