काठमाडौं । वाग्मती प्रदेशका रिक्सन वाइबा र गण्डकी प्रदेशकी सुस्मिता थापा यस वर्ष नेपाल आईटीएफ तेक्वान्दोका उत्कृष्ट खेलाडी घोषित भएका छन् । 

नेपाल आईटीएफ तेक्वान्दो महासंघले आफ्नो २७औँ वार्षिकोत्सवका अवसरमा यस वर्ष उत्कृष्ट प्रदर्शन गर्ने खेलाडीसँगै प्रशिक्षक र जिल्लालाई पुरस्कृत गरेको हो । 

कोसीकी सजिना तामाङ यस वर्षको उदीयमान खेलाडीका रूपमा पुरस्कृत भइन् । महासंघले आफ्नो २७औं स्थापना दिवसका अवसरमा मानव सेवा आश्रममा खाना खुवाउने, रक्तदान गर्ने र सरसफाइलगायत गतिविधि गरेको महासंघका अध्यक्ष प्रविणकुमार कार्कीले जानकारी दिए । 

महासंघले अन्तिम दिने भने वर्षभर उत्कृष्ट योगदान दिने खेलाडी, प्रशिक्षक, प्रदेश र जिल्लालाई पुरस्कृत गरेको हो । यस वर्षको उत्कृष्ट प्रशिक्षकको अवार्ड लुम्बिनीका कृष्ण थापामगरले प्राप्त गरे । महासंघले उदीयमान प्रशिक्षकका रूपमा मनोज पुलामी मगरलाई पुरस्कृत गरेको छ । 

उत्कृष्ट प्रदेश लुम्बिनी र उत्कृष्ट जिल्ला काठमाडौंले प्राप्त गर्‍यो । अवार्ड प्राप्त गर्ने खेलाडीलाई नेपाल सरकार प्रवक्ता एवम् सञ्चार तथा सूचना प्रविधिमन्त्री पृथ्वीसुब्बा गुरुङ, राष्ट्रिय खेलकुद परिषद् (राखेप)का बोर्ड सदस्य अन्जन धमला र महासंघका अध्यक्ष कार्की लगायतले पुरस्कृत गरेका थिए ।