काठमाडौं । मनसुनजन्य विपद्का घटनामा परी पछिल्लो करिब दुई महिनाको अवधिमा नेपालमा १६७ जनाले ज्यान गुमाएका छन् ।

२०८१ जेठ २८ देखि साउन २३ गते दिउँसोसम्मको अवधिमा उनीहरूले बाढी, पहिरो, चट्याङ लगायतका मनसुनजन्य विपद्का घटनामा परी ज्यान गुमाएका हुन् । 

नेपाल प्रहरीका अनुसार मनसुनजन्य विपद्का घटनामा परी काठमाडौं उपत्यकामा तीनजना, कोसी प्रदेशमा २५, मधेसमा ६, वाग्मतीमा ३०, गण्डकीमा ५२, लुम्बिनीमा ३३, कर्णालीमा आठ, र सुदूरपश्चिम प्रदेशमा १० जनाको मृत्यु भएको छ ।

काठमाडौं उपत्यकामा ११ जना, कोसी प्रदेशमा ३७, मधेसमा १०, वाग्मतीमा १९, गण्डकीमा ४४, लुम्बिनीमा १३, कर्णालीमा ५१ र सुदूरपश्चिममा १४ गरी १९९ जना घाइते भएको प्रहरीले जनाएको छ ।

बाढीपहिरोमा परी कोसीमा दुईजना, वाग्मतीमा ४२, गण्डकीमा चार, कर्णालीमा एक र सुदूरपश्चिममा एक गरी ५० जना बेपत्ता भएका छन् । वेपत्ताको खोजी कार्य जारी छ । 

गत जेठ २८ गतेयता आएको बाढीका कारण ३८४ घर डुबानमा परेका छन् । उक्त अवधिमा विपद्का घटनाबाट चार हजार २७२ घर परिवार विस्थापित भएका छन् ।