ढाका/नयाँ दिल्ली । बंगलादेशका तत्कालीन प्रधानमन्त्री शेख हसिना वाजेदले सोमबार राजीनामा दिएर देश छोड्नु अघिल्लो राति सेनाले कर्फ्यु तोड्नेलाई गोली हान्न नसक्ने जनाउ दिएको बताइएको छ ।

बंगलादेशका सेना प्रमुख जनरल वाकर उज जमानले आइतबार आफ्ना जनरलहरूसँग बैठक गरेका थिए । उक्त बैठकले कर्फ्यु तोडे पनि नागरिकलाई गोली नचलाउने निर्णय गरेको सो बैठकबारे जानकार सेवारत दुई आर्मी अफिसरले रोयटर्सलाई बताएका छन् ।

त्यसपछि प्रधानसेनापति वाकर प्रधानमन्त्रीको कार्यालयमा गएर सिपाहीहरू उनले घोषणा गरेको लकडाउन कार्यान्वयन गर्न नसक्ने अवस्थामा रहेको बताएका थिए । यसको सन्देश हसिनालाई सेनाको समर्थन छैन भन्ने थियो । 

त्यसपछि नै हसिनाले राजीनामा दिएर देश छोड्ने ‘मुड’ बनाएकी थिइन् । उनका छोरा तथा सल्लाहकार सजीव वाजेदले यसअघि सार्वजनिक मन्तव्यका क्रममा आफ्नी आमाले आइतबार नै राजीनामाको ‘मुड’ बनाएको बताएका थिए ।

समाचार एजेन्सीहरूका अनुसार अहिलेका प्रधानसेनापतिका ससुरा जनरल मुस्ताफिजुर रहमान शेख हसिनाका काका हुन् । काकाको ज्वाईं भनेपछि हसिनाको पनि उनी बहिनीज्वाईं पर्छन् । 
(रोयटर्समा आधारित)