ढाका । बंगलादेशमा आइतबार प्रधानमन्त्री शेख हसिना वाजेदको राजीनामा माग गर्दै भएको विद्यार्थी आन्दोलनका क्रममा मृत्यु हुनेको संख्या कम्तीमा ९० पुगेको छ । आक्रमणमा १३ प्रहरी पनि मारिएका छन् ।

आन्दोलन हिंसात्मक भएपछि बंगलादेशमा आइतबार रातिदेखि देशव्यापी कर्फ्यु आदेश जारी गरिएको छ । इन्टरनेट सेवामा पनि रोक लगाइएको छ ।

प्रधानमन्त्री हसिनाले आइतबार राति नै सुरक्षा परिषद्को बैठक डाकेकी थिइन् । उनले हिंसात्मक आन्दोलनमा उत्रिनेलाई आतंककारीको संज्ञा दिएकी छन् । हिंसामा संलग्नलाई हटाउन सहयोग गर्न उनले नागरिकलाई आह्वान पनि गरेकी छन् ।

हरेक दिन बिहान ६ देखि राति ९ बजेसम्म कर्फ्यु लाग्ने जनाइएको छ । बंगलादेश सरकारले आजदेखि तीन दिनसम्म देशमा सार्वजनिक बिदा दिने समेत निर्णय गरेको छ ।

यसैबीच, बंगलादेशमा पूर्वसैन्य प्रमुख इकबाल करिब भुइयाँले एक वक्तव्य जारी गरी सशस्त्र बललाई तुरुन्तै आफ्नो मिलिटरी क्याम्पमा फर्कन आग्रह गरेका छन् । उनले अहिलेको संकटलाई संवादका माध्यममार्फत निकास दिन पनि आग्रह गरेका छन् ।

हालैको आरक्षणविरोधी आन्दोलनमा २०० भन्दा बढी विद्यार्थी मारिएको र करिब १० हजारजनालाई पक्राउ गरिएको थियो ।

विद्यार्थीले देशव्यापी रूपमा अवज्ञा आन्दोलन सुरु गर्दै नागरिकलाई कर र युटिलिटिज बिल नतिर्न पनि भनेका छन् । विद्यार्थीले सबै कलकारखाना र सार्वजनिक यातायात बन्द गर्न समेत आग्रह गरेका छन् ।

विद्यार्थी आन्दोलनका नेता नहिद इश्लामले प्रधानमन्त्री हसिनाले राजीनामा मात्र होइन, नागरिकको हत्या गरिएकामा उनीमाथि अभियोजन समेत हुनुपर्ने जनाएका छन् । लुट र भ्रष्टाचारका बारेमा पनि छानबिन गरिनुपर्नेमा उनले जोड दिएका छन् । बीबीसीबाट ।