काठमाडौं । चलचित्र ‘कार्साङ’को छायांकन सुरु भएको छ । यम शेर्पाको निर्देशनमा निर्माण हुन लागेको चलचित्रको छायांकन मंगलबारबाट सिन्धुपाल्चोकको बाह्रबिसे नगरपालिकास्थित यार्सा गाउँबाट सुरु भएको हो । 

सामाजिक कथावस्तुमा निर्माण हुने ‘कार्साङ’को छायांकन सेड्युल लगातार एक महिनाको राखिएको छ । 

चलचित्रको मुख्य कलाकारमा दयाहाङ राई, सिर्जना निङ्लेकु, जितु नेपाल, दीया मास्के, बुद्धि तामाङ, छिरिङ शेर्पा र सरिता गिरी छन् । नवनायिकाका रूपमा सिर्जना र छिरिङले डेब्यु गर्दै छन् ।

यसअघि थुप्रै छोटा फिल्मको निर्देशन गरिसकेका निर्देशक यम शेर्पालेको यो डेब्यु निर्देशन हो । निर्देशक स्वयंको कथा, पटकथा तथा संवाद छ । 

चलचित्रका निर्माता पुरुषोत्तम प्रधान हुन् । प्रधानकै डीओपी रहने चलचित्रमा गोविन्द बोहरा सह–निर्माता छन् । आङछिरिङ शेर्पा कार्यकारी निर्माता हुन् ।