काठमाडौं । चिनियाँ राजदूत छन् सोङले सामाजिक सञ्जालमा लेखेको विषयमा सांसदहरूले आपत्ति जनाएका छन् । केही दिनअघि त्रिशूली नदीमा खसेको बस खोजी कार्यको मजाक उडाउँदै राजदूतले सामाजिक सञ्जालमा गरेको टिप्पणीमा सांसदले आपत्ति जनाएका हुन् । 

मंगलबारको प्रतिनिधिसभा बैठकको शून्य समयमा बोल्दै नेपाली कांग्रेका सांसद रामहरि खतिवडाले राजदूतले सामाजिक सञ्जालमा लेखेको विषयमा परराष्ट्र मन्त्रालयले बोलाएर स्पष्टीकरण सोध्नुपर्ने बताए । 

“बस नखोज चुम्बक खोज भन्ने गरिएको छ । कमसेकम नेपाललाई आपत पर्दा सहयोग गरौँ । अप्ठ्यारो परेका बेला हाँसीमजाकमा नउडाउ,” उनले भने, “यसमा परराष्ट्र मन्त्रालयले सम्बन्धित राजदूतलाई बोलाएर स्पष्टीकरण लियोस् ।” 

उनले चिनियाँ राजदूतले गम्भीर कूटनीतिक मर्यादाविपरीत अभिव्यक्ति दिएको भन्दै कडा निन्दा गरे ।