काठमाडौं । नेकपा (एकीकृत समाजवादी)का अध्यक्ष एवं पूर्वप्रधानमन्त्री माधवकुमार नेपालले नेपाली हरेक क्षेत्रमा प्रतिभाशाली र योग्य रहेको बताएका छन् । मंगलबार काठमाडौंमा आयोजित एक कार्यक्रममा उनले यस्तो बताएका हुन् ।

नेपाली विद्यार्थी र युवापुस्ताले विभिन्न क्षेत्रमा कीर्तिमान कायम गरेको उनले उल्लेख गरे । उनले नेपाली युवा अध्ययन, अनुसन्धान, खेलकुदलगायत सबै क्षेत्रमा प्रतिभाशाली रहेको बताए ।

आफू २०५१ सालमा रक्षामन्त्री बन्दा ‘कडा’ रूपमा प्रस्तुत भएको उनले सुनाए । उनले राजा वीरेन्द्रले तत्कालीन प्रधानसेनापतिलाई बर्खास्त गर्न नचाहँदा पनि आफूले हटाउको जानकारी गराए । तत्कालीन प्रधानसेनापतिले भ्रष्टाचार गरेपछि बर्खास्त गर्नुपरेको उनको भनाइ थियो । उनका अनुसार, त्यति बेलासम्म नेपाली सेनामा महिला भर्ती गरिँदैन थियो ।

उनले विद्यार्थी अनुशासित भएर बस्नुपर्ने पनि बताए । अनुशासित भए मात्र राम्रो जीवनयापन गर्न सकिनेमा उनले जोड दिए ।

कार्यक्रममा माधव नेपालको भनाइ पढ्नोस्–
नयाँ विद्यार्थी, नयाँ युवाहरू एक से एक प्रतिभाशाली छन्, संसारमा पनि कीर्तिमान कायम गरेका छन् । नेपाली युवाहरू जुनसुकै क्षेत्रमा – पढाइको क्षेत्रमा होस्, अनुसन्धानको क्षेत्रमा होस्, चाहे सगरमाथा आरोहण गर्ने क्षेत्रमा होस्, युद्धको मैदानमा होस्, ब्रिटिस सेनालाई पराजित गर्ने हिम्मत गर्ने नेपाली गोरखा सैनिक हो । विश्वका ती देशहरूमा जहाँ गृहयुद्ध चलिरहेको छ, त्यो गृहयुद्धलाई शान्त गर्न सबैभन्दा प्रभावकारी कोही देखिन्छ भने त्यो नेपाली सेना नै छ । म लेबनान गएको थिएँ । म त्यहाँ गएको लेबनानमा रहेका नेपाली सेनाका हाकिमहरूले थाहा पाए, उनीहरू मलाई भेट्न आए । किन आए थाहा छ ? किनभने, म सेनाको पनि रक्षामन्त्री थिएँ । २०५१ सालमा रक्षामन्त्री भएपछि प्रधानसेनापतिलाई पनि सञ्चालन गर्नुपर्छ । म कडा रक्षामन्त्री थिएँ । प्रधानसेनापतिलाई जागिरबाट निकालिदिएँ, भ्रष्टाचार गरेको हुनाले । त्यो बेलामा राजा वीरेन्द्र थिए । वीरेन्द्रले भने ‘एकपटक माफ दिइदिनुस् न त भने’, मैले भनेँ– माफी दिन सकिँदैन, यस्ता मान्छेलाई राखेर नेपाली सेनाको इज्जत बढ्न सक्दैन । म रक्षामन्त्री भएको बेलामा नेपाली सेनामा महिलालाई भर्ना गरिँदैन थियो । न्युज एजेन्सी नेपाल