काठमाडौं । संक्रमणकालीन न्यायसम्बन्धी विधेयकमा नेताहरू सहमतिनजिक पुगेका छन् । सोमबार बिहान सिंहदरबारस्थित गृह मन्त्रालयमा बसेको बैठकमा संक्रमणकालीन न्यायसम्बन्धी विधेयकमा सैद्धान्तिक सहमति भएको बताइएको हो ।

संक्रमणकालीन न्यायसम्बन्धी विधेयक टुंगो लगाउन गठित कार्यदलका सदस्य एवं नेकपा (एमाले)का प्रमुख सचेतक महेशकुमार बर्तौलाले टीआरसी विधेयक करिब टुंग्याउने चरणमा पुगेको बताए । हालसम्मका कार्य र सम्बन्धित निकायसँगका छलफलको समीक्षा र प्रतिवेदन आउँदो बिहीबारभित्र तयार पारिने उनले जानकारी दिए ।

अब लामो समयसम्म पीडितलाई थप पीडामा जोडिरहने अवस्थाको अन्त्य हुने उनले उल्लेख गरे । उनले कानुनलाई चाँडोभन्दा चाँडो टुंग्याई यही ऐनअनुसार आयोग बनाएर पीडितलाई न्याय दिने र पीडकलाई सजायको दायरामा ल्याउने गरी आफूहरू अघि बढेको जानकारी दिए ।

कार्यदलको बैठक बिहीबार बिहान ८ बजे पुनः बस्नेछ ।

बैठकपछि महेश बर्तौलाको भनाइ पढ्नोस्–
अब हामी टीआरसी विधेयक करिबकरिब अब टुंग्याउने चरणमा हामी पुग्यौँ । हामीले बैठक टुंग्याएका छैनौँ । अब दुई दिन अहिलेसम्मको सबै छलफलहरूलाई नियालेर प्रतिवेदन ल्याउँछौँ । पहिलाको मूल ऐन, संशोधन विधेयक, संसदीय समितिको उपसमितिहरूमा वा समितिमा भएका छलफल र हाम्रो संयन्त्रमा छलफल भई डेभलप भएका विषयहरू र सहमतिको वरपर पुगेका विषयहरूलाई पनि कम्पाइल गरेर एकीकृत ढगले ल्याउने कुरा भएको छ । बिहीबार ८ बजे बैठक बसेर त्यो फाइनल डकुमेन्ट हेरेपछि त्यसको आधारमा फिनिसिङ गर्छौँ । अब हामी सबैले सबै जिम्मेवारीबोधका साथ यसलाई सिंगो देशको मुद्दा बनाएर, विषय बनाएर, सत्तापक्ष र प्रतिपक्षको नभईकन सिंगो देश र शान्तिको प्रक्रियालाई निष्कर्षमा पुर्‍याउने विषयसँग जोडेर अगाडि बढ्दा यो निष्कर्षमा पुग्ने अवस्था देखिन्छ । त्यही विश्वासका साथ यो काम गरिरहेका छौँ । मेरो विचारमा अब हामी १८ वर्षदेखि विभिन्न हिसाबले उतारचढावमा रहेको, टुंगोमा पुग्न नसकेको, पीडितले न्याय पाउन नसकेको अवस्थालाई हामी लामो समयसम्म पीडितलाई थप पीडामा जोडिरहने अवस्थाको अन्त्य गर्नेछौँ । यो कानुनलाई अब चाँडोभन्दा चाँडो टुंग्याएर, यही ऐनअनुसार आयोग बनाएर पीडितलाई न्याय दिने र पीडकलाई सजायको दायरामा ल्याउने गरी अघि बढेका छौँ । यो महत्त्वपूर्ण छ । न्युज एजेन्सी नेपाल