काठमाडौं । निर्माण व्यवसायी महासंघका अध्यक्ष रवि सिंहले तीन वर्षदेखि सम्बोधन नभएका निर्माण व्यवसायीका समस्या मौद्रिक नीतिले सम्बोधन गरेको बताएका छन् । 

नेपाल राष्ट्र बैंकले ल्याएको चालु आर्थिक वर्ष २०८१/०८२ को मौद्रिक नीति सार्वजनिकपछि न्युज एजेन्सी नेपालसँगको कुराकानीमा अध्यक्ष सिंहले निर्माण व्यवसायीहरूले बैंकबाट लिएको कर्जा समायोजनको समय थप गरिदिएर व्यवसायीहरूलाई केही हदसम्म राहत प्रदान गरेको बताए । 

उनले मौद्रिक नीतिले सम्बोधन गरेका समस्याहरू विगत तीन वर्षदेखि भोग्दै आए पनि विगतका सरकार र राष्ट्र बैंकले समेत सम्बोधन नगर्दा आज अर्थतन्त्र चलायमान हुन नसकेको बताए । निर्माण क्षेत्र चलायमान नहुँदा समग्र अर्थतन्त्रमा परेको प्रभावले सरकार र राष्ट्र बैंक संवेदनशिल देखिएको बताए । 

उनले राष्ट्र बैंकले ल्याएको मौद्रिक नीतिले निर्माण क्षेत्रका समस्या समाधान हुने विश्वास व्यक्त गरे । उनले निर्माण क्षेत्रमा भएको संवेदनशिलता र अफ्ठ्यारोहरूलाई बुझेर मौद्रिक नीति आएको बताए । 

उनले मौद्रिक नीतिसँगै कार्यविधि बन्दा निर्माण क्षेत्रमा भएको पुँजी अभावलाई सम्बोधन गर्नुपर्ने बताए ।