काठमाडौं । नयाँ सिजनअघिको क्लब मैत्रीपूर्ण खेलमा प्रिमियर लिग च्याम्पियन म्यानचेस्टर सिटी स्कटिस टोली सेल्टिकसँग ४–३ ले पराजित भएको छ ।

बुधबार अमेरिकास्थित केनान मेमोरियल रंगशालामा भएको खेलमा सेल्टिकलाई जित दिलाउन निकोलस गेरिक कुनले दुई गोल गरे । केयोगो फुरुहासी र लुइस पाल्माले समान एक गोल थपे । सिटीका ओस्कार बब, माक्सिमो पेरोने र एर्लिङ हाल्यान्डले समान एक गोल फर्काएका थिए ।

कुनले १३औँ मिनेटमा गोल गर्दै सेल्टिकलाई अग्रतामा राखेका थिए । तर, ३३औँ मिनेटमा बबले गोल गरेपछि सिटी खेलमा फर्किएको थियो । ३६औँ  मिनेटमा कुनले दोस्रो गोल गर्दा सेल्टिकले पुनः २–१ को अग्रता बनाएको थियो । ४४औँ मिनेटमा फुरुहासीले गोल गरेपछि सेल्टिकले पहिलो हाफमा ३–१ को अग्रता बनाएको थियो ।

४६औँ मिनेटमा पेरोनेले सिटीबाट दोस्रो गोल फर्काए । ५७औँ मिनेटमा हाल्यान्डको गोलमा सिटी बराबरीमा फर्किएको थियो । तर, ६८औँ मिनेटमा पाल्माले गरेको निर्णायक बनेपछि सेल्टिकले ४–३ को रोमाञ्चक जित निश्चित गरेको हो ।

प्रि–सिजन तयारीमा रहेको सिटीले अब इटालीयन क्लब एसी मिलान, स्पेनिस क्लब बार्सिलोना र अर्को इंग्लिस क्लब चेल्सीसँग खेल्ने तालिका छ । यस्तै, सेल्टिकले अब आइतबार चेल्सीसँग खेल्नेछ ।