काठमाडौं । स्वास्थ्य तथा जनसंख्यामन्त्री प्रदीप पौडेलले डेंगी संक्रमण नियन्त्रणका निम्ति स्थानीय तह, अस्पताल तथा स्वास्थ्यकर्मीलाई तयारी अवस्थामा राखिएको बताएका छन् ।

मंगलबार प्रतिनिधिसभामा सांसदहरूले उठाएका प्रश्नको जवाफ दिने क्रममा मन्त्री पौडेलले पछिल्ला ६ महिनायता एकहजार ८०० जनामा डेंगी पुष्टि भएको र आगामी तीन महिनाको जोखिमलाई हेरेर तयारी गरिएको बताए ।

मन्त्री पौडेलका अनुसार डेंगीबारे ८०० बढी चिकित्सक सवाथ्यकर्मीलाई अभिमुखीकरण तालिम दिएर सबै अस्पताललाई तयारी अवस्थामा राखिएको छ ।

डेंगीको परीक्षण, उपचार, सचेतना कार्यक्रमका निम्ति चालु आर्थिक वर्षमा स्थानीय तहमा सात करोड ९८ लाख र जिल्लास्तरमा दुई करोड रुपैयाँ बजनेट विनियोजन गरिएको छ । 

साथै, परीक्षणका निम्ति सबै तहमा गरी ४६ हजार किट वितरण गरिएको र प्रदेशस्तरका प्रयोगशालालाई पनि तयारी राखिएको उनले बताए । डेंगी नियन्त्रणका निम्ति 'खोज र नष्ट गर' अभियान तथा मृत्युलाई शून्यमा राख्न तीनवटै तहमा समन्वयको काम भइरहेको मन्त्री पौडेलले बताए । 

उनले जापानमा प्रयोग भइरहेको डेंगीविरुद्धको खोप ल्याउनेबारे पनि मन्त्रालयले काम अघि बढाउने प्रतिबद्धता जनाए ।

मंगलबारको प्रतिनिधिसभा बैठकमा सांसद प्रतिमा गौतमले डेंगीको प्रकोपलाई लिएर जरुरी सार्वजनिक महत्त्वको प्रस्ताव प्रस्तुत गरेकी थिइन् । प्रस्तावमा चारजना सांसदले समर्थन गरेका थिए । प्रस्तावमा १५ जना सांसदले धारणा राखे ।

प्रस्तावमा तीव्ररूपमा देशभरि फैलिई जनस्वास्थ्य संकट उत्पन्न हुन गई अस्पतालमा गम्भीर अवस्थाका बिरामीहरू भर्ना हुने संख्यामा वृद्धि, समाजमा डर र त्रासको माहोल उत्पन्न भएकाले डेंगीको प्रभावकारी नियन्त्रण एवं भविष्यमा सिर्जना हुने गम्भीर र दीर्घकालीन असर न्यूनीकरण तथा रोकथामका लागि सरकारलाई निर्देशन दिन अपरिहार्य भएको उल्लेख थियो ।

सांसदहरूले डेंगी संक्रमण नियन्त्रणका निम्ति सचेतनाका कार्यक्रममा जोड दिन, स्थानीय तहलाई सक्रिय बनाउन, डेंगी फैलिन नदिन अन्तर मन्त्रालय समन्वय गर्न तथा समयमै पूर्वतयारी गर्न जोड दिएका थिए । साथै संक्रमण नियन्त्रणका निम्ति जापानमा प्रयोग भइरहेको खोप ल्याउनेबारे पनि सांसदहरूले मन्त्रालयको धारणा मागेका थिए ।