नयाँ दिल्ली । भारतमा मंगलबार ल्याइएको नयाँ बजेटमा न्यु ट्याक्स रिजिम चुन्नेलाई स्टयान्डर डिडक्सन ५० हजारबाट बढाएर ७५ हजार भारु पुर्‍याइएको छ ।

अर्थमन्त्री निर्मला सीतारमणले प्रस्तुत गरेको उक्त बजेटमा तीन लाखसम्म कुनै कर नलाग्ने, सात लाखसम्म ५ प्रतिशत र १० देखि १२ लाख भारुसम्मको तलब हुनेका निम्ति १५ प्रतिशत कर तोकिएको छ । १५ लाखसम्मको तलबमा २० र १५ लाखभन्दा माथिमा ३० प्रतिशत कर तोकिएको छ ।

उनले ‘इनकम ट्याक्स एक्ट’ ६ महिनामा समीक्षा गरिने जनाएकी छन् । इनकम ट्याक्स सहज गरिने र टीडीएस समयमा नदिइएमा त्यसलाई अपराध मानिने जनाइएको छ ।

बजेटमा क्यापिटल गेन लिमिटलाई २५ हजारबाट बढाएर अब एक लाख २५ हजार बनाइएको छ । लगानीमा लगाइने एन्जेल ट्याक्सलाई अब हटाइएको जनाइएको छ ।

भारतीय अर्थमन्त्रीले शिक्षा र रोजगारका निम्ति १.४८ लाख करोड भारु बजेट विनियोजन गरेकी छन् । उनका अनुसार, बजेट रोजगार, प्रशिक्षण, एमएसएमई र मध्यमवर्गमा केन्द्रित गरिएको छ । बीबीसी हिन्दीबाट ।