![नेपालमै पहिलोपटक असुसले ल्यायो एआई ल्यापटप, यस्ता छन् फिचर](https://12khari.top/uploads/posts/asus-laptop-s15-vivobook-1721720011.png)
काठमाडौं । असुसले नेपालमै पहिलोपटक आर्टिफिसियल इन्टेलिजेन्स (एआई) ल्यापटप सार्वजनिक गरेको छ । माइक्रोसफ्ट र क्वालकमसँगको सहकार्यमा कम्पनीले १५.६ इञ्चको एआई पीसी सार्वजनिक गरेको हो ।
असुसका लागि नेपालको आधिकारिक वितरक नागमणी इन्टरनेसनलले असुस भिभोबुक विन्डोज ११ मा आधारित कोपाइलटसहितको भिभोबुक एस १५ सार्वजनिक गरेको हो ।
१५.६ इञ्चको यो ल्यापटपमा विभिन्न नयाँ एआई फिचर छन् भने कोपाइलटका लागि ल्यापटपको किबोर्डमै डेडिकेटेड बटन रहेको छ ।
के छन् विशेषता ?
ल्यापटमा रहेको स्न्यापड्र्यागन एक्स एलिट न्युरल प्रोसेसिङ युनिट (एनपीयू) विश्वकै तीव्र एनपीयू रहेको कम्पनीको दाबी छ । यसले ४५ ट्रिलियन टास्क प्रतिसेकेन्ड गर्नसक्ने हुँदा एआईका लागि उत्कृष्ठ रहेको असुसले जनाएको छ ।
१४.७ मिलिमिटर पातलो र एक किलो ४२० ग्राम तौल रहेको ल्यापटपमा ७० वाटआवरको ब्याट्री १८ घण्टा टिक्ने बताइएको छ । ल्यापटपले ५.८ जीबीपीएस वाईफाई सात सपोर्ट गर्ने बताइएको छ । चार्जिङका लागि ९० वाटको एसी एड्याप्टर छ ।
ल्यापटपमा ३के १२० हर्जको लुमिना ओलेड डिस्प्ले रहेको छ, जसको स्क्रिनटूबडी रेसियो ८९ प्रतिशत छ । क्वालकमको स्न्यापड्र्यागन एक्स एलिट प्लेटर्फममा बनेको ल्यापटमा ओरियन सीपीयू, हेक्जागन एनपीयू र एन्ड्रेनो जीपीयू छ ।
१६ जीबी र्याम र एक टेराबाइटसम्म स्टोरेज रहेको ल्यापटपमा एफएचडी आईआर एवं एआईसेन्स क्यामेरा छ ।ल्यापटपमा दुईवटा यूएसबीफोर, दुईवटा यूएसबी ३.२ जेन १ टाइप–ए, एउटा एचडीएमआई २.१ टीएमडीएस, एउटा अडियो कम्बोज्याक र एउटा माइक्रोएसडी कार्ड रिडर पोर्ट रहेको छ ।
कोपाइलट कि समेत रहेको ल्यापटपमा आरजीबी किबोर्ड छ । स्मार्ट गेस्चर र साइलेन्ट चटप्याड रहेको ल्यापटपमा डल्बीएटम्स अडियो सिस्टम छ ।
कति छ मूल्य ?
असुस भिभोबुक एस १५ (एस५५०७)को १६ जीबी र्याम र एक टेराबाइट स्टोरेज रहेको ल्यापटपको मूल्य नेपालमा दुई लाख ९ हजार ९०० रुपैयाँ रहेको छ । नागमणीले असुसका ल्यापटपमा दुई वर्षको ग्लोबल वारेन्टी दिने बताइएको छ ।
यस्तै, यी ल्यापटपमा पर्फक्ट ग्यारेन्टी सुविधामार्फत ग्राहकले पहिलोपटक टुटेफुटेकै ल्यापटपसमेत मर्मत गर्दा २० प्रतिशतमात्रै शुल्क लाग्ने कम्पनीले जनाएको छ । सफ्टवयरसम्बन्धी मर्मतसम्भारमा भने हरेक पटक ८० प्रतिशत छुट र २० प्रतिशत मात्रै पैंसा तिर्नुपर्ने कम्पनीको भनाइ छ ।