काठमाडौं । नेपाली भाषाको शुद्धताका निम्ति विगत १३ वर्षदेखि अभियान सञ्चालन गर्दै आएका भाषाकर्मीले सर्वोच्च अदालतको फैसलालाई स्वागत गर्दै खुसी व्यक्त गरेको छ । सोमबार पाटनढोकास्थित यलमाया केन्द्रमा आयोजित कार्यक्रममा ‘नेपाली कसरी शुद्ध लेख्ने (नेकशुले)’ अभियानमा आबद्ध भाषाकर्मीले नेकशुलेको मर्मानुरूप सर्वोच्चबाट फैसला भएको भन्दै एकापसमा खुसी साटासाट गरे ।

गएको असार ९ गते सर्वोच्चले टिप्पणी आदेशका भरमा वर्णविन्यास र व्याकरण परिवर्तन गर्न नहुने फैसला गरेको थियो । नेपाली भाषाको वर्णविन्यास भत्काइएको र त्यसलाई बदर गर्नुपर्ने भन्दै स्वागत नेपाल र टपेन्द्र कार्कीले रिट दायर गरेका थिए । रिटमाथि सुनुवाइपछि सर्वोच्चका न्यायाधीशहरू सपना प्रधान मल्ल र सारंगा सुवेदीको संयुक्त इजलासबाट उक्त फैसला गरिएको थियो ।

कार्यक्रममा भाषाविद् शरच्चन्द्र वस्तीले सर्वोच्चको फैसला नेकशुलेको भावनाअनुसार आएको भन्दै खुसी व्यक्त गरे । वस्तीले उक्त फैसलाले भाषालाई जथाभावी गिजोल्न नहुने मान्यता स्थापित गरिदिएको उल्लेख गरे ।

कार्यक्रममा नेपाली भाषाका कोशकार चूडामणि गौतमले भाषाको शुद्धताबारे बोले । भाषाशास्त्री मुकुन्दशरण उपाध्यायले भाषाका क्षेत्रमा थप काम गरिनुपर्ने बताए । अग्रज साहित्यिक पत्रकार रोचक घिमिरेले भाषाको प्रयोगमा एकरूपता हुनुपर्नेमा जोड दिए ।

कार्यक्रममा प्रकाश वस्ती, खगेन्द्र संग्रौला, रमेश खकुरेल, लोचन भट्टराईलगायत व्यक्तिले बोलेका थिए । त्यस अवसरमा संकल्प प्रस्ताव पनि पारित गरिएको थियो ।