काठमाडौं । गत आर्थिक वर्ष २०८०/८१ को अन्त्यसम्म नेपालको वैदेशिक व्यापार घाटा १४ खर्ब ४० अर्ब ६० करोड ४२ लाख रुपैयाँ कायम भएको छ । अघिल्लो वर्ष २०७९/८० को तुलनामा व्यापार घाटा केही घटे पनि निर्यातमा आएको संकुचनको प्रभाव त्यसमा देखिएको भन्सार विभागले जनाएको छ ।

अघिल्लो वर्षको तुलनामा व्यापार घाटा ०.९६ प्रतिशतले घटेको छ । तर, अघिल्लो वर्षको तुलनामा आयात र निर्यात कम भएकाले व्यापार घाटा पनि घटेको देखिएको हो ।

गत आर्थिक वर्षको अन्त्यसम्म १५ खर्ब ९२ अर्ब ९८ करोड रुपैयाँको वस्तु तथा सेवा आयात गरिएको छ । उक्त अवधिमा एक खर्ब ५२ अर्ब ३८ करोड रुपैयाँको वस्तु तथा सेवा निर्यात गरिएको छ । अघिल्लो वर्षका तुलनामा आयात १.१६ र निर्यात ३.०३ प्रतिशतले घटेको छ ।

नेपालको वैदेशिक व्यापार कुल १७ खर्ब ४५ अर्ब ३६ करोड रुपैयाँको भएको विभागले जनाएको छ ।