काठमाडौं । सहकारी संस्थाको बचत रकम दुरुपयोगबारे संसदीय छानबिन विशेष समितिले संघीय मामिला तथा सामान्य प्रशासन मन्त्रालयका साथै स्थानीय तहका प्रतिनिधिसँग छलफल गरेको छ ।

सोमबार सिंहदरबारमा बसेको समितिको १९औँ बैठकमा संघीय मामिला तथा सामान्य प्रशासन मन्त्रालयका सचिवका साथै नगरपालिका संघ, गाउँपालिका राष्ट्रिय महासंघलगायत निकायका प्रतिनिधिसँग छलफल गरिएको समितिका संयोजक सूर्य थापाले जानकारी दिए ।

छलफलका क्रममा स्थानीय तहमा रहेका २४ हजार सहकारीमध्ये कुनैमा पनि ठगीसम्बन्धी समस्या नदेखिएको जानकारी प्राप्त भएको उनले बताए ।

थापाले स्थानीय तहमा सहकारीलाई थप सुदृढ बनाउनका साथै समस्यामुक्त बनाउन सुझाव समेत प्राप्त भएको उल्लेख गरे ।

उनले सहकारी संस्थाको बचत दुरुपयोगका विषयमा सरोकारवालासँग निरन्तर छलफल गर्ने र आवश्यक निष्कर्षमा पुगिने जानकारी दिए । हिमालयन टेली भ्वाइस