![नियमित सुनुवाइमा फर्कियो सर्वोच्च अदालत](https://12khari.top/uploads/posts/supreme-court-1716337743.jpg)
काठमाडौं । सर्वोच्च अदालत वर्षान्तपछि आजदेखि नियमित कार्यसूचीमा फर्किएको छ । आर्थिक वर्ष २०८०/०८१ अन्त्यपछिको एक हप्ता सर्वोच्चमा बन्दी प्रत्यक्षीकरणसहितका मुद्दामा मात्र सुनुवाइ भइरहेको थियो । आर्थिक वर्ष २०८१/०८२ सुरु भएपछि आज पहिलोपटक सबै मुद्दा पेसीमा चढेका हुन् ।
सर्वोच्चमा आइतबार नौ इजलासमा ४५८ मुद्दा पेसी चढेकोमा १०८ स्थगित भएका छन् । अन्य ६ मुद्दा हेर्न नमिल्नेमा परेका छन् ।
पुराना फैसलाको पूर्णपाठ लेखनसहितका काम गर्ने गरी सर्वोच्चमा विगतमा १५ दिनभन्दा बढी सयमसम्म सुनुवाइ रोकिने गरेको थियो । तर, सर्वोच्चले पाँचौँ पञ्च वर्षीय रणनीतिक योजनामा २०८६ सालसम्म दुई वर्ष नाघेका मुद्दा बाँकी नराख्ने लक्ष्य लिएको छ । हरेक वर्ष लगतको कम्तीमा ५० प्रतिशत मुद्दा फर्स्योट गर्ने लक्ष्यका कारण पनि यसपटक अदालतहरू छिट्टै नियमिति सुनुवाइमा फर्किएर मुद्दाको लगत घटाउने उद्देश्यमा छन् ।
सर्वोच्चमा १० वर्ष नाघेका सात मुद्दा बाँकी छन् । पाँच वर्ष नाघेका मुद्दा तीनहजार २४२ छन् । गत आर्थिक वर्षबाट लगतमा आएका कुल २५ हजार ४२८ मुद्दा बाँकी छन् । यी मुद्दा पनि चाँडो फर्स्योट गरी सर्वसाधारणमा समयमै न्याय पाइन्छ भन्ने सन्देश दिएर जनआस्था अभिवृद्धि गर्ने लक्ष्य न्यायालयको छ ।