काठमाडौं । वाग्मती प्रदेशका केही स्थानमा बिहानैदेखि वर्षा भए पनि काठमाडौं उपत्यकामा भने मौसम साधारणतया सफा छ । जल तथा मौसम विज्ञान विभागका अनुसार काठमाडौंको अपराह्नपछि वर्षा हुनेछ । 

“काठमाडौं उपत्यकामा आज वर्षाको सम्भावना छ । अपराह्नपछि काठमाडौंमा वर्षा हुनेछ,” मौसमविद् गोविन्द झा बाह्रखरीसँग भन्छन्, “काठमाडौंमा २ बजेपछि हल्का वर्षा हुनेछ । करिब दुईतीन घण्टा वर्षा हुनेछ ।” 

काठमाडौंमा राति पनि वर्षा हुने उनी बताउँछन् । “काठमाडौंमा आजजस्तै भोलि पनि वर्षा हुनेछ,” उनले भने, “शनिबार र आइतबारको तुलनामा सोमबार काठमाडौं उपत्यकामा कम वर्षा हुनेछ ।” 

विभागका अनुुसार आज बिहान वाग्मतीसँगै कोसी, गण्डकी, लुम्बिनी र कर्णाली प्रदेशका एकदुई स्थानमा हल्का वर्षा भइरहेको छ ।

• दिउँसो मध्यम राति भारी वर्षाको सम्भावना 

दिउँसो देशभर आंशिकदेखि साधारणतया बदली रहनेछ । कोसी, वाग्मती, गण्डकी, लुम्बिनी, कर्णाली र सुदूरपश्चिम प्रदेशका केही स्थानमा मध्यम वर्षाको सम्भावना छ । 

मधेस प्रदेशका थोरै स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ । 

राति कोसी, वाग्मती, गण्डकी, लुम्बिनी र सुदूरपश्चिम प्रदेशका केही स्थानमा हल्कादेखि मध्यम वर्षाको सम्भावना छ ।

बाँकी प्रदेशका थोरै स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ । कोसी, वाग्मती, गण्डकी र सुदूरपश्चिम प्रदेशका एकदुई स्थानमा भारी वर्षाको सम्भावना रहेको मौसमविद् झाले जानकारी दिए । उनका अनुसार दिउँसोभन्दा राति धेरै वर्षा हुनेछ ।