वासिङटन । अमेरिकामा रिपब्लिकन पार्टीबाट राष्ट्रपति पदका उमेदवार डोनाल्ड ट्रम्पले ताइवानले आफ्नो सुरक्षाका निम्ति अमेरिकालाई तिर्नुपर्ने बताएका छन् । ब्लुमबर्ग बिजनेस विकमा मंगलबार प्रकाशित अन्तर्वार्तामा अमेरिकाका पूर्वराष्ट्रपति समेत रहेका ट्रम्पले यस्तो बताएका हुन् ।

ट्रम्पको यो भनाइले उनी आउँदो नोभेम्बरमा निर्वाचित भएर आएमा वासिङटन र ताइपेईबीचको सम्बन्धमा अप्ठ्यारो आउने संकेत गरेको छ ।

“मैले त्यहाँका मानिसलाई राम्रोसँग जान्दछु । उनीहरूलाई ठूलो सम्मान गर्छु । उनीहरूले हाम्रो शतप्रतिशत चिप बिजनेस लिएका छन् । मलाई लाग्छ, ताइवानले रक्षाका लागि हामीलाई तिर्नुपर्छ,” ब्लुमबर्गले सार्वजनिक गरेको ट्रान्सक्रिप्टमा भनिएको छ ।

चीनले आफ्नो भूभाग दाबी गरेको ताइवान वरपर बेलाबेलामा कतिपय सैनिक गतिविधि समेत गर्दै आएको छ । हालसम्म ताइवानलाई अमेरिकाले बलियो ढाडस दिइरहेकामा ट्रम्पको पछिल्लो भनाइ आएको हो ।

उनले अगाडि भनेका छन्, “हामी इन्स्योरेन्स कम्पनीभन्दा फरक होइनौँ । ताइवानले हामीलाई केही पनि दिँदैन ।”

अमेरिका ताइवानको मुख्य हतियारदाता पनि हो । केहीअघि मात्र अमेरिकी संसद्ले मल्टी बिलियन डलरको मिलिटरी सहायता प्याकेज बेइजिङलाई ‘काउन्टर’ दिने उद्देश्यले पास गरेको थियो ।

ट्रम्पको भनाइबारे बुधबार पत्रकारसँग ताइवानका प्रधानमन्त्री चो जङ ताइले आफूहरूले रक्षा बजेट बलियो बनाउँदै लगेको बताए । आफ्नो सुरक्षा आफैँ गर्न जिम्मेवार रूपमा अघि बढेको उनले उल्लेख गरे ।

उनले ताइवान र अमेरिकाको सम्बन्ध पछिल्ला वर्षमा निकै बलियो भएको बताए । ताइवान र इन्डोप्यासिफिक क्षेत्रको शान्ति र स्थिरता आफूहरूबीचको साझा लक्ष्य र जिम्मेवारी भएको उनको भनाइ थियो । एजेन्सी