काठमाडौं । राष्ट्रिय स्वतन्त्र पार्टी (रास्वपा)का निलम्बित महामन्त्री मुकुल ढकालले रवि लामिछानेमाथि सहकारी र पासपोर्ट प्रकरणमा छानबिन गर्न उच्चस्तरीस्य समिति गठनको माग गरेका छन् ।

आफूमाथि भएको कारबाहीपछि पहिलोपटक पत्रकार सम्मेलन गरेका ढकालले लामिछानेमाथि सर्वोच्च अदालतले नै अनुसन्धान गर भनेकाले पार्टीले पनि छानबिन समिति गठन गर्नुपर्ने बताए । 

“हिजो उहाँ (रवि लामिछाने)ले आफूले कुनै सहकारीबाट ऋण लिएको छैन र आफूविरुद्ध जाहेरी पनि छैन भनिरहनुभएको थियो,” ढकालले भने, “तर सर्वोच्च अदालतले उहाँमाथि गम्भीर प्रश्न उठाएको छ । त्यसकारण पार्टीबाटै उच्चस्तरीय समिति बनाएर उहाँमाथि छानबिन गर्नुपर्छ ।” 

उनले पासपोर्टका विषयमा पनि पार्टीबाट छानबिन हुनुपर्ने बताए । रविसँग दुईवटा पासपोर्ट रहेको उनको आरोप छ ।