काठमाडौं । राष्ट्रिय स्वतन्त्र पार्टी (रास्वपा)का निलम्बित महामन्त्री मुकुल ढकालले समीक्षा यात्रापछि आफूले सभापति रवि लामिछानेसँगको सहमतिमै मिडियामा बोलेको बताएका छन् । सभापति लामिछानेले आफूलाई सरकारविरुद्ध नबोल्न भनेपछि नबोलेको पनि स्पष्ट पारे । 

बुधबार पत्रकार सम्मेलन गर्दै उनले ज्वाला संग्रौला र रमेश प्रसाईं लगाएर रवि लामिछानेले ‘मुकुल ढकाल मेरोविरुद्ध छ’ भन्ने भाष्य निर्माण गरेको जानकारी दिए । “मैले बोलेको कुरा सभापतिको अनुमति र सहमतिमा बोलेको हो । सरकारको विषयमा नबोल्देउ भनेपछि मैले त्यो कुरा बोलिन । तर, बोलेको कुरा समझदारीमा बोलेको हो सोधेर बोलेको हो,” उनले भने, “मैले पार्टी सभापति रवि लामिछानेविरुद्ध बोलेको छैन । पार्टी जोगाउनु पर्छ भनेको हो । उहाँले ज्वाला संग्रौला र रमेश प्रसाईंलाई परिचालित गरेर, मुकुल ढकाल रवि लामिछानेविरुद्धमा गयो भनेर भाष्य सेट गर्नुभयो ।” 

उनले आफूले कालो टेप लगाएर बैठकमा प्रस्तुत हुनु गलत भएको भए त्यसको भागिदार हुने बताए । तर, महामन्त्रीले कालो टेप लगाएर बैठकमा उपस्थित हुँदा बैठक स्थगित गरेर वार्ता गर्ने प्रयास रवि लामिछानेले नगरेको बताए ।

“मैले उहाँसँग पटक पटक कुरा गर्न चाहे । तर, कुरा गर्न चाहनु भएन । तपाईंलाई प्रचण्ड, ओली, देउवाको घर जान मिल्छ भने भाइ वा महामन्त्री मान्ने भए वार्ता गर्न आउन मिल्छ । तर, उहाँ आउनु भएन,” उनले भने ।