काठमाडौं । नेपाली कांग्रेसका सांसद सुनील शर्माले प्रधानमन्त्री पुष्पकमल दाहाल ‘प्रचण्ड’ले यही असार २८ गते विश्वासको मत लिनुअघि पूर्वाञ्चल विश्वविद्यालयमा मेडिकल कलेज सञ्चालन हुन नसक्नुको कारणसहित जवाफ दिनुपर्ने माग गरेका छन् ।

आइतबार प्रतिनिधिसभा बैठकमा उनले नेकपा (माओवादी केन्द्र)का अध्यक्ष प्रचण्ड नेतृत्वको सरकारले दुईवटा मात्र राम्रो काम गरेको बताए । तीमध्ये पूर्वाञ्चल विश्वविद्यालयमा मेडिकल कलेज सञ्चालन गर्ने र आर्थिक नीतिमा दफा ५७ संशोधन मुख्य भएको उनले उल्लेख गरे ।

तर, मन्त्रिपरिषद्बाट गरिएको निर्णय किन कार्यान्वयन नभएको भन्ने जवाफ दिन उनले माग गरे । उनले पूर्वका विद्यार्थीका निम्ति त्यो सुनौलो अवसर भए पनि निर्णय कार्यान्वयन नगरिँदा निराशा छाएको बताए ।

उनले अर्थमन्त्री वर्षमान पुनले करको दफा ५७ संशोधन गर्ने कोसिस गरेको भन्दै धन्यवाद दिए । दफा ५७ संशोधनले नेपालका उद्योगी र नयाँ स्टार्टपका निम्ति पनि नयाँ ढोका खोल्ने काम गरेको उनले उल्लेख गरे ।

सांसद शर्माले प्रधानमन्त्री प्रचण्डप्रति लक्षित गर्दै गायक रामकृष्ण ढकालको ‘ओराली लागेको हरिणको चाल भयो’ गीत सुनाए । उनले प्रचण्ड नेतृत्वको सरकारले विदेशबाट हुर्रा र मुर्रा मात्र ल्याएको टिप्पणी गरे । न्युज एजेन्सी नेपाल