काठमाडौं । कोपा अमेरिका–२०२४ को क्वार्टरफाइनलबाट बाहिरिएपछि ब्राजिलका प्रशिक्षक डोरिभल जुनियरले टिममा बदलाब ल्याउन समय लाग्ने बताएका छन् ।

आइतबार क्वार्टरफाइनलमा ब्राजिलविरुद्ध पेनाल्टी सुटआउटमा ४–२ को जित निकाल्दै उरुग्वेले १३ वर्षपछि कोपा अमेरिकाको सेमिफाइनलमा स्थान बनाएको छ । मार्सेलो बियल्साको टिम १० खेलाडीमा समेटिएको थियो । तर, निर्धारित समयमा उरुग्वेले सन् २०१९ को विजेता ब्राजिललाई गोलरहित बराबरीमा रोकेको थियो ।

“हामी यो टिमको अति महत्त्वपूर्ण नवीकरण र पुनर्निर्माणको प्रक्रियामा छौँ । मैले यो टिमलाई आठ खेलमा मात्र प्रशिक्षण दिएको छु र यो त्यही प्रक्रिया हो, जसबाट हामी जानैपर्छ,” प्रतियोगिताबाट बाहिरिएपछि डोरिभलले भने, “हामी कठिन स्थितिबारे जानकार छौँ र यो यात्रा पार गरेर आउनेछौँ । अहिले हामीले नकआउट चरणको खेलमा हार व्यहोरेको छौँ, जुन हाम्रो अपेक्षाविपरीत थियो । तर, हामीसँग सुधारका लागि धेरै कुरा छन् । अबको हाम्रो मुख्य लक्ष्य विश्वकपका निम्ति छनोट हुनु हो । अहिले हामी कन्मेबोलको छैटौँ स्थानमा छौँ, जुन सहज अवस्था होइन ।”

प्रतियोगितामा स्वाभाविक लयका निम्ति संघर्षरत ब्राजिलले एक खेलमा मात्र जित निकाल्न सफल रह्यो । समूह चरणका दुई खेलमा बराबरी खेलेको ब्राजिलले पराग्वेलाई हराएको थियो । उरुग्वेले अब फाइनलमा पुग्न कोलम्बियाविरुद्ध खेल्नेछ ।