काठमाडौं । काठमाडौं महानगरपालिकाका मेयर बालेन्द्र शाह (बालेन)ले केही घण्टाकै वर्षामा कतिपय बस्ती डुबानमा परेको भन्दै समस्या समाधानमा जोड दिएका छन् । खोला बस्तीमा पसेको नभएर आफ्नो बाटो खोजेको उनले उल्लेख गरेका छन् ।

शनिबार बेलुका उनले सामाजिक सञ्जालमा लेखेका छन्, “...आज एक दिन पानी पर्दा त यस्तो हालत छ, केही दिन लगातार पानी पर्दा के हालत हुने हो ।”

तस्बिरसहितको उक्त पोस्टमा नेकपा (एमाले)का अध्यक्ष केपी शर्मा ओलीलाई सम्बोधन गरिएको छ । “अनि ठूलो दुर्घटना कुन दिन आउँछ भनेर कुर्दै बस्ने हो र हामी ? उहाँहरूको जीवनसँग खेलवाड गरेर भोटको राजनीति यसरी नै सधैँ गरिरहने हो ?,” उनले प्रश्न गरेका छन् ।

मेयर बालेनले प्रभावित स्थानीयको उचित व्यवस्थापनमा समेत जोड दिएका छन् । “...तपाईंले पचाउन खोज्नुभएको गिरीबन्धुमा यस्ता १५,००० परिवार व्यवस्थापन हुनसक्छ,” उनले लेखेका छन्, “अब त प्रधानमन्त्री’नि बन्दै हुनुहुन्छ रे, त्यो पनि दुईतिहाइ बहुमतसहित । अब यो समस्याको समाधान गर्नुहुनेछ भन्ने आशा लिएको छु ।”