तनहुँ । अविरल वर्षासँगै म्याग्दे खोलामा आएको बाढीले तनहुँको म्याग्दे गाउँपालिका–४ स्थित घुम्ती बजारका घर डुबानमा परेका छन् । शुक्रबारदेखि परेको वर्षाका कारण म्याग्दे खोलामा आएको बाढीले यहाँका घरहरू डुबानमा परेका हुन् ।

शुक्रबारसम्म सामान्य रहे पनि शनिबार बिहानदेखि खोलामा जलसतह निकै बढेको जिल्लास्थित उद्योग वाणिज्य संघका कोषाध्यक्ष भीमलाल श्रेष्ठले जानकारी दिए । खोलामा आएको बाढीले यहाँका १४ घर डुबानमा परेका छन् ।

उनले भने, “प्रत्येक वर्षको वर्षाका समयमा यहाँ बाढी र डुबानको समस्या हुन्छ । यसको समाधान हुन नसक्दा प्रत्येक वर्ष घर डुबानमा पर्ने तथा स्थानीय विस्थापित हुने गरेका छन् ।”

जिल्ला प्रशासन कार्यालयले भारी वर्षा भइरहेकाले नदीतटीय र पहिरो जोखिम क्षेत्रका बासिन्दालाई उच्च सतर्कता अपनाउन आग्रह गरेको छ । प्रमुख जिल्ला अधिकारी जनार्दन गौतमले वर्षाका कारण हुन सक्ने क्षति न्यूनीकरणका निम्ति सबैलाई आग्रह गरेका छन् ।

मर्स्याङ्दीले पार गर्‍यो सतर्कता तह
तनहुँको बन्दीपुर गाउँपालिका–४, विमलनगरस्थित मर्स्याङ्दी नदीले सतर्कता तह पार गरेको छ । शुक्रबारदेखि परेको अविरल वर्षाका कारण शनिबार बिहानदेखि नदीले सतर्कता तह पार गरेको हो । तटीय क्षेत्रका बासिन्दालाई सतर्क रहन र सावधानी अपनाउन आग्रह गरिएको प्रजिअ गौतमले बताए ।

जल तथा मौसम विज्ञान विभागले नदीतटीय क्षेत्रमा आइतबारसम्म उच्च सतर्कता अपनाउन आग्रह गरेको छ । विभागका अनुसार, मर्स्याङ्दी नदीको सतह १०.२५ मिटरभन्दा माथि आएको छ ।

तनहुँका भानु नगरपालिका, बन्दीपुर गाउँपालिका, आँबुखैरेनी गाउँपालिका हुँदै यो नदी मुग्लिनमा पुगेर त्रिशूलीमा मिसिन्छ । रासस