![राष्ट्रियसभा बैठकमा सांसदले गरे ‘रुलिङ’ माग](https://12khari.top/uploads/posts/rastriya-sava4-1717324818.jpg)
काठमाडौं । राष्ट्रियसभा बैठकको शून्य समयमा मंगलबार सांसदहरूले समसामयिक विभिन्न विषयमा सरकारको ध्यानाकर्षण गराएका छन् ।
राष्ट्रियसभा सदस्य कमला पन्तले वर्षाका कारण बाढीपहिरो र डुबानको समस्या भएको उल्लेख गरिन् । मुलुकको अवस्थाका बारेमा सभामा जानकारी गराउनुपर्ने उनले माग गरिन् ।
उनले राष्ट्रियसभाका अध्यक्षले ‘रुलिङ’ गर्ने गरे पनि सरकारको जवाफ नआउने गरेको गुनासो गरिन् । उनले एक हप्ताभित्र सरकारको जवाफ आउने गरी पुनः रुलिङको माग गरिन् ।
राष्ट्रियसभा सदस्य दुर्गा गुरुङले कर्णाली प्रदेशका जनताप्रति सरकार निर्मम भएको बताइन् । उनले काठमाडौंले आफूलाई शासक र कर्णालीका जनतालाई रैति ठानेर पर्याप्त बजेटको व्यवस्था नगरिएको आरोप लगाइन् । संघीयतामा साधनस्रोतको समान वितरण नभएको उनले गुनासो गरिन् ।
“कर्णाली प्रदेशप्रति नेपाल सरकार फेरि निर्मम बनेको छ । राज्य एकीकरणको प्रक्रियासँगै केन्द्रीय सत्ताको कोपभाजनमा परेको कर्णाली प्रदेशको दशा अझै उस्तै छ,” उनले भनिन् ।
राष्ट्रियसभा सदस्य नारायणदत्त मिश्रले बुटवल–नारायणगढ सडकखण्ड छिटो बनाउन सरकारलाई रुलिङ गर्नुपर्ने माग गरे । कैलालीको भजनी र टीकापुर नगरपालिका र जोशीपुर गाउँपालिकामा भयावह रूपमा बाढी आउने गरेको भन्दै उनले समयमै सचेत भएर आवश्यक व्यवस्था मिलाउनुपर्ने बताए ।
राष्ट्रियसभा सदस्य भुवनबहादुर सुनारले नेपालका सडक मानव मृत्युको साधन बनिरहेको भन्दै तत्काल सुधार गर्नुपर्नेमा जोड दिए । ट्राफिक नियमलाई कडाइका साथ पालना गर्नुपर्ने र चालकलाई सचेतना गराउनुपर्ने उनले बताए ।
राष्ट्रियसभा सदस्य सुरेशकुमार आलेले अहिलेको व्यवस्था पुँजीवादी भएको भन्दै भ्रष्टाचारको अन्त्य नहुने टिप्पणी गरे । भ्रष्टाचार अन्त्य गर्न समाजवादी व्यवस्था ल्याउनुपर्ने उनको भनाइ थियो ।
“...यो व्यवस्थामा भ्रष्टाचार नहोस् भनेर भन्नु डुङडुङ्ती गन्हाउने कुकुर काखमा लिएर मगमग बास्ना आइदिए हुन्थ्यो भनेजस्तै हो । यो सम्भव छैन,” उनले भने, “हामी भ्रष्टाचार नहुने समाजवादी व्यवस्थातिर जानुपर्ने हुन्छ । त्यो बारेमा धेरै चिन्तनमनन भएको पाइँदैन ।” न्युज एजेन्सी नेपाल