![देउवाले एमालेसँगको सहकार्यबारे मुखै खोलेनन्, महामन्त्रीलाई समेत छैन जानकारी !](https://12khari.top/uploads/posts/Sher-bahadur-deuba-1716213286.jpg)
काठमाडौं । नेपाली कांग्रेसका सभापति शेरबहादुर देउवाले सत्ता समीकरणबारे पार्टीमा कुनै जानकारी नगराएको खुलेको छ ।
सोमबार अपराह्न देउवाले आफ्नै निवासमा पार्टीका पदाधिकारी र पूर्वपदाधिकारीहरूको बैठक बोलाएका थिए । बैठकमा नेताहरूले नयाँ सत्ता समीकरणबारे प्रश्न गरेका थिए ।
तर, जवाफमा देउवाले एमाले अध्यक्ष केपी शर्मा ओलीले आफूलाई चिया पिउन बोलाएको मात्र बताएको एक पदाधिकारीले जानकारी दिए ।
"कांग्रेस–एमालेको सरकार बन्ने कुरा के हो ? भनेर सबै जनाले सोध्यौँ । उहाँले ओलीले बोलाउनुभयो । चिया खायौँ । बीआरआईबारे कुरा भयो मात्रै भन्नुभयो । नयाँ सत्ता समीकरणबारे केही बोल्दै बोल्नुभएन," ती पदाधिकारीले भने ।
![Global Ime bank](https://baahrakhari.com/uploads/bigyaapan/30885600.gif)
नयाँ सत्ता समीकरणका लागि देउवाले रमेश लेखकलाई खटाएजस्तो देखिएको ती पदाधिकारी बताउँछन् ।
"यो सत्ता समीकरणको तयारीबारे उपसभापति, महामन्त्री कसैलाई जानकारी छैन । देउवाले रमेश लेखकलाई खटाएजस्तो देखिन्छ," ती पदाधिकारीले भने ।