हालै नेपाल प्रहरीमा बढुवा क्रममा भएको दुईवटा ‘बेथिति’का प्रतिनिधि उदाहरण प्रकाशमा आएका छन् । कोही महिनौ अगाडि पद रिक्त हुँदा पनि बढुवा नगरिँदा अवकाशमा गएका छन् भने कसैलाई दुई दिनका लागि बढुवा गर्न पद रिक्त नहुँदै सिफारिस गरिएको छ ।

नेपाल प्रहरीभित्र सरुवामा मात्र होइन बढुवामा पनि बेथिति हुने पुरानै रोग हो । दुर्भाग्य, राजनीतिक व्यवस्थामा भएको आमूल परिवर्तनपछि पनि ‘पाँडे पजनी’ प्रवृत्तिमा भने सुधार हुनसकेन । यसरी अन्याय गर्नेहरूमाथि प्रश्न नउठाइने हो भने सम्भवतः यस विकृतिको अन्त्य पनि हुँदैन । 

नेपाल प्रहरी अस्पतालमा करिब दुई महिना पहिलेदेखि प्रहरी नायब महानिरीक्षकको पद रिक्त भएको थियो । तर, बढुवा प्रक्रिया सुरु नै नगरिएपछि योग्यता पुगेका दुई अधिकृत वरिष्ठ प्रहरी उपरीक्षक पदबाटै अवकाशमा गए । बढुवा प्रक्रिया स्वचालित भएको भए उनीहरूमाथि अन्याय हुने थिएन । 

अर्को प्रतिनिधि उदाहरणले भने सत्ताको चरम दुरुपयोगको पोल खोल्छ । कसैको कृपा पाएकै कारण एकजनालाई प्रहरी अतिरिक्त महानिरीक्षक पदमा दुई दिनका लागि बढुवा गरिने भएको छ । उमेर हदका कारण बढुवा भएको दुई दिनपछि नै उनले अवकाश पाउनेछन् । 

यसमा थप रोचक पक्ष के छ भने ‘दुई दिने’ बढुवा गर्ने निर्यण गरिँदा माथिल्लो दरबन्दी रिक्त पनि भएको छैन । प्रस्तावित बढुवा खाने अधिकृतले अवकाश पाउनुभन्दा दुई दिन पहिलेमात्र उमेरहदकै कारण पद रिक्त हुनेछ । ‘अजब नेपाल’का शासकको गजबको तरिका !

यस्तो ‘लाजमर्दो’ बढुवाको निर्णय गर्ने सिफारिस समितिमा गृहसचिव संयोजक, प्रधानमन्त्री तथा मन्त्रिपरिषद् कार्यालयका सचिव सदस्य र प्रहरी महानिरीक्षक सदस्य सचिव हुन्छन् । समितिका सदस्यहरूले विवेकसम्मत रूपमा अधिकार प्रयोग गर्नुको साटो कसैको ‘माथिको आदेश’मा निर्णय गरेको अनुमान सहजै गर्न सकिन्छ ।  

यसपटकको ‘बढुवा बेथिति’ गृहमन्त्रीको इसारामा भएको आरोप लगाइएको छ । तालुकवाला विभागीय मन्त्री हुनाले प्रत्यक्ष संलग्नता नभए पनि यस बेथितिको नैतिक जिम्मेवारी त गृहमन्त्रीकै हुन्छ । त्यसमाथि ‘दुई दिने’ बढुवाका पात्रसँगको गृहमन्त्रीको सम्बन्धको सार्वजनिक नालीबेली पत्याउन नपर्ने आधार पनि देखिएको छैन । 

सरुवा बढुवामा हुने बेथिति यसरी नै बढ्दै जाने हो भने राज्यको जनतासँग पहिलो सम्पर्क हुने नेपाल प्रहरीको अवस्था थप कति क्षतविक्षत होला अनुमान गर्न पनि सकिँदैन । अहिलेको सरकारबाट सुधारको अपेक्षा नभए पनि राज्यकै साख गिर्ने गरी थप बेथिति नगरिदिए हुनेथियो ।