नयाँ दिल्ली । भारतको प्रमुख प्रतिपक्षी कांग्रेस अध्यक्ष मल्लिकार्जुन खड्गेले भारतमा प्रधानमन्त्री नरेन्द्र मोदीले अघोषित संकटकाल लागु गरिरहेको आरोप लगाएका छन् । भारतमा १८औँ लोकसभाको पहिलो सत्रको अवसरमा बोल्दै उनले प्रधानमन्त्री मोदीले संविधानलाई तोड्ने प्रयास गरेको समेत आरोप लगाए । 

उनले भने, “जनताले हामीलाई साथ दिएका छन् । तर, प्रधानमन्त्री मोदीले संविधान तोड्ने प्रयास गरेका छन् । आज सबै पार्टी (इन्डिया गठबन्धन)का मानिस एक भएर विरोध प्रदर्शन गरिरहेका छन् । यहाँ जहाँ गान्धीको प्रतिमा थियो त्यहीँ हामी विरोध प्रदर्शन गरिरहेका छौँ । उहाँले संविधानका हरेक नियमलाई तोडिरहनु भएको छ ।  हामी भन्न चाहन्छौँ कि मोदीजी संविधानअनुसार चल्नुस् ।’

प्रधानमन्त्री मोदीले १८औँ लोकसभाको पहिलो सत्र भन्दा पहिला बोल्ने क्रममा २५ जुन १९७५मा भारतमा संकटकाल लगाइएको घटनाको पनि स्मरण गरेका थिए । यसमा टिप्पणी गर्दै कांग्रेस अध्यक्ष खड्गेले भने, “१०० पटक यही कुरा गर्नुहुन्छ । संकटकालको ५० वर्ष भइसकेको छ । आफू (प्रधानमन्त्री मोदी)ले अघोषित संकटकाल लगाइरहनु भएको छ । हरेकपटक यही कुरा गरेर तपाईं कतिन्जेल हुकुम चलाउन चाहनुहुन्छ ?’

इन्डिया गठबन्धनका सांसद १८औँ लोकसभाको पहिलो सत्रको सन्दर्भमा संविधानको कपी लिएर संसद् परिसरमा विरोध प्रदर्शन गरेका थिए । बीबीसी