काठमाडौं । श्रम, रोजगार तथा सामाजिक सुरक्षामन्त्री डोलप्रसाद अर्यालले केही व्यक्तिको बदमासीका कारण सहकारी क्षेत्र बदनाम भएको बताएका छन् । 

ललितपुरमा आइतबार आयोजित 'सहकारी रोजगार मेला'को समापन कार्यक्रमका मन्त्री अर्यालले केही मानिसले गरेको अपराधका कारण समग्र सहकारी क्षेत्रलाई हेर्ने दृष्टिकोण परिवर्तन भएको बताए । उनले अब सहकारी क्षेत्रलाई व्यवस्थित बनाउनुपर्नेमा जोड दिए ।

केही व्यक्तिहरू आफूले राखेका अवैध सम्पत्ति लुकाउनका लागि सहकारीकै बदनाम गरिरहने प्रयासमा लागेको उनको भनाइ छ । मन्त्री अर्यालले सहकारी अभियन्ता भनिनेहरू नै ठगी प्रकरणमा मुछिनु दु:खद भएको धारणा राखे । उनले सहकारी अभियन्ता भनिनेहरू नै ठगी प्रकरणमा मुछिनु दु:खद भएको धारणा राखे ।

उत्पादनलाई बजारीकरण गर्न नेपालमा सहकारी क्षेत्रले गरेको योगदान बिर्सन नहुने उनको भनाइ छ । उनले मुलुकमा अर्थतन्त्र चलायनमान बनाउन सहकारीको भूमिकाकाबारे समाजमा सकारात्मक बहस गर्ने बेला आएको पनि बताए । 

'मर्यादित सहकारी व्यवसायका लागि युवा संलग्नता' नाराका साथ राष्ट्रिय सहकारी महासंघ नेपालले सहकारी रोजगार मेला आयोजना गरेको थियो ।