काठमाडौं । प्रमुख प्रतिपक्ष दल नेपाली कांग्रेसले प्रतिनिधिसभाको आगामी सबै बैठकमा अनिवार्य उपस्थिति हुन आफ्ना सांसदहरूलाई निर्देशन दिएको छ ।  

शुक्रबार संसद् भवनस्थित ल्होत्से हलमा बसेको पार्टीको संसदीय दलको बैठकले सो निर्देशन दिएको हो । बैठकपछि सञ्चारकर्मीसँग कुरा गर्दै प्रमुख सचेतक रमेश लेखकले आगामी आर्थिक वर्ष २०८१/०८२ को विनियोजन विधेयक अब प्रतिनिधिसभाको आउने बैठकहरूमा निर्णयार्थ प्रस्ततु हुने कार्यसूची रहेकाले सांसदहरुलाई अनिवार्य उपस्थित हुन निर्देशन दिएको जानकारी दिए । 

उनले यही असार ९ गतेदेखि प्रारम्भ हुने सबै बैठकमा विनियोजन विधेयक निर्णयार्थ प्रस्तुत नहुँदासम्मका सबै बैठकहरुमा सबै सदस्यहरूको अनिवार्य उपस्थिति हुन निर्देशन दिने बैठकले निर्णय गरेको जानकारी दिए । 

“आगामी आर्थिक वर्ष २०८१/०८२ को विनियोजन विधेयक अब प्रतिनिधिसभाको आउने बैठकहरूमा निर्णयार्थ प्रस्ततु हुने कार्यसूची रहेको छ । त्यसो भएकाले ९ गतेदेखि प्रारम्भ हुने सबै बैठकमा विनियोजन विधेयक निर्णयार्थ प्रस्तुत नहुँदासम्मका सबै बैठकहरूमा सबै मान्य सदस्यहरुको अनिवार्य उपस्थिति हुनुपर्छ भनेर आजको संसदीय दलले निर्णय गरेको छ,” उनले भने ।  

उनले अनिवार्य रूपले उपस्थित हुन र दलको ह्वीप निर्देशनअनुसार गर्न आग्रह गरे । जनताका, जनजीविकाका, देश र जनताको पक्षका विषयहरूलाई सघन ढंगले मुखरित गरेर संसद्‌मा उठाउनुपर्ने दायित्व प्रतिपक्षको भएको उनको भनाइ छ ।

उनले पछिल्लो समयमा संघीय संसद्का बैठकमा सदस्यहरूको उपस्थिति पातलो भएकाले कांग्रेसका सांसदलाई बैठकहरूमा निरन्तर उपस्थित हुन र देश जनताका पक्षमा आवाज उठाउन पनि निर्देशन दिएको जानकारी दिए ।