काठमाडौं । उद्योग, वाणिज्य तथा आपूर्तिमन्त्री दामोदर भण्डारीले उद्योगहरूको पक्षमा कानुन निर्माण गरी जटिलता हटाउन सरकार सकारात्मक रहेको बताएका छन् ।

शुक्रबार बसेको प्रतिनिधिसभाअन्तर्गतको उद्योग तथा वाणिज्य र श्रम तथा उपभोक्ता हित समितिले बैठकमा बोल्दै उद्योगमन्त्री भण्डारीले यस्तो बताएका हुन् । उनले सरकारले बनाउने हरेक कानुन उद्योगमैत्री बनाउन नसके उद्योगमा देखिएका समस्या समाधान गर्न नसकिने उल्लेख गरे ।

सिमेन्ट उद्योगमा देखिएका समस्या समाधान गर्न सरकारले कानुन संशोधन गर्नुको विकल्प नरहेको स्पष्ट पारे । समितिले सिमेन्ट उद्योगको लागि गर्ने निर्णय मन्त्रालय मान्न तयार रहेको उनको भनाइ छ ।

उनले सिमेन्टको गुणस्तर, सामाजिक र वातावरणमैत्री बनाउन मन्त्रालय गम्भीर रहेको बताए । उनले भने, "सिमेन्ट उद्योगको लागि समितिले गर्ने निर्णय मान्न तयार छु । समितिले म्याद थप गर्नुहुन्छ । समय अवधि तोक्नुहुन्छ । नेपालका उद्योग जुन अवस्थामा छन् । त्यहाँबाट उठाउनुपर्छ । पैरवी गर्नुपर्छ । उद्योगीहरूलाई मन्त्रालयले रक्षा गरेन भने त्यसको पक्षमा कानुन निर्माण गरिएन भने अहिलेको जटिलतालाई सम्बोधन गर्न सकिँदैन ।"

उनले सरकारले बनाउने कानुनहरूलाई उद्योगमैत्री बनाउने विषयमा मन्त्रालय सहजीकरण गर्न तयार रहेको बताए ।