काठमाडौं । संघीय मामिला तथा सामान्य प्रशासनमन्त्री भानुभक्त जोशीले संघीय निजामती सेवासम्बन्धी विधेयक संसद्को चालु अधिवेशनबाट पारित गर्ने बताएका छन् । 

शुक्रबार मन्त्रालयको सय दिनको कामबारे जानकारी दिन सिंहदरबारमा आयोजित पत्रकार सम्मेलनमा उनले चालु अधिवेशनमा सो विधेयक पारित गराउन मन्त्रालय प्रतिबद्ध रहेको बताए । छलफलको माग भएपछि विधेयक पारित गराउन समय लागेको जानकारी दिँदै उनले सो विधेयकलाई टुंगो लगाउन सरकारले सराकारवाला पक्षसँग पनि फेरि छलफल गर्ने बताए । 

“यो वर्षे अधिवेशनमा यो विधेयक आउँछ । यो विधेयक सबैको चासो र चिन्ताको विषय भएकाले यसमा धेरै छलफल पनि भयो । अहिले पनि विद्यालय शिक्षा विधेयक पनि अलि सजिलो ढंगले आउन सकेको छैन भने यही विधेयकमा पनि अलि बढी छलफल गर्नुपर्ने भएको हुनाले यो आउन सकेन । तर, मैले फेरि पनि दोहोर्‍याएर भन्छु– यो विधेयक यो अधिवेशनबाट पास गर्ने तयारी गर्छौँ,” मन्त्री जोशीले भने ।