काठमाडौं । वर्षाका कारण प्रभावित बनेको आईसीसी ट्वान्टी–२० विश्वकपअन्तर्गत सुपर–८ को खेलमा अस्ट्रेलियाले बंगलादेशविरुद्ध डकर्वथ लेविस पद्धति (डीएलएस) अनुसार २८ रनको जित निकालेको छ ।

शुक्रबार बिहान एन्टिगोवास्थित सर भिभियन रिचार्ड्स रंगशालामा भएको खेलमा प्याट कुमिन्सले ह्याट्रिक लिँदा टस हारेर ब्याटिङमा आएको बंगलादेशले निर्धारित २० ओभरमा १४० रनमात्र बनाएको थियो । १४१ रनको लक्ष्यसहित मैदान उत्रिएको अस्ट्रेलियाले ११.२ ओभरमा दुई विकेट गुमाएर १०० रन बनाउँदा वर्षा भएपछि खेल रोकिएको थियो । यसपछि पुनः सञ्चालन हुन नसक्दा अस्ट्रेलिया डीएलएसअनुसार २८ रनले विजयी भएको हो ।

अस्ट्रेलियाको जितमा ओपनर डेविड वार्नरले ५३ रन बनाए । उनले ३५ बलमा पाँच चौका र तीन छक्का प्रहार गरे । ट्राभिस हेडले २१ बलमा तीन चौका र दुई छक्कासहित ३१ रन थपे । ग्लेन म्याक्सवेल १४ रनमा अविजित रहे ।

बंगलादेशका लागि दुवै विकेट रिसाद हुसैनले लिए ।

त्यसअघि बंगलादेशका कप्तान नज्मुल हुसैन सान्टोले ४१ रन बनाएका थिए । तोहिद हृदोयले ४० रन थप्दा लिटोन दासले १६ र तास्किन अहमेदले १३ रन बनाए ।

बंगलादेशलाई मध्यम योगफलमा रोक्न अस्ट्रेलियाका प्याट कुमिन्सले ह्याट्रिक लिए । कुमिन्सले १८औँ ओभरको अन्तिम दुई बल र २०औँ ओभरको पहिलो बलमा लगातार विकेट लिँदा जारी विश्वकपमै ह्याट्रिक लिने पहिलो बलरसमेत बने । ट्वान्टी–२० विश्वकपको इतिहासमा भने यो सातौँ ह्याट्रिक हो ।

बंगलादेशविरुद्ध कुमिन्सबाहेक, एडम जाम्पाले दुई विकेट लिए । मार्कुस स्टोइनिस, मिचेल स्टार्क र ग्लेन म्याक्सवेलको नाममा समान एक विकेट रह्यो ।

प्रतियोगितामा अस्ट्रेलिया समूह ‘बी’ को विजेता र बंगलादेश समूह ‘डी’ को उपविजेता बन्दै सुपर–८ मा आएका हुन् ।