काठमाडौं । सूर्यकुमार यादवको अर्धशतकप्रेरित भारतले आईसीसी ट्वान्टी–२० विश्वकपअन्तर्गत सुपर–८ को खेलमा अफगानिस्तानलाई १८२ रनको लक्ष्य दिएको छ ।

बिहीबार बार्बाडोसस्थित केङ्सिङ्टनमा टस जितेर ब्याटिङमा आएको भारतले निर्धारित २० ओभरमा आठ विकेट गुमाएर १८१ रनको योगफल खडा गरेको हो ।

भारतका मध्यक्रम ब्याटर सूर्यकुमारले ५३ रन बनाए । उनले २८ बलमा पाँच चौका र तीन छक्का प्रहार गरे । ९०–५ को स्थितिबाट सूर्यले हार्दिक पन्ड्यासँग छैटौँ विकेटका लागि ६० रनको साझेदारी गर्दै भारतको इनिङ सम्हालेका थिए । 

पन्ड्याले २४ बलमा तीन चौका र दुई छक्कासहित ३२ रन बनाए । ओपनर विराट कोहलीले २४, ऋषब पन्तले २० र सिवम दुवेले १० रन थपे । अक्षर पटेलले १२ रन जोडे ।

अफगानिस्तानका फजलहक फारुकी र राशिद खानले समान तीन विकेट लिए । नविन उल हकको नाममा दुई विकेट रह्यो ।

प्रतियोगितामा भारत समूह ‘ए’ को शीर्ष स्थानमा र अफगानिस्तान समूह ‘सी’ को दोस्रो स्थानमा रहँदै सुपर–८ मा आएका हुन् ।